Një shpikje e re në Gjermani: plastikë nga celuloza

Hulumtuesit nga Universiteti i Gottingen, në Gjermani, kanë krijuar një material të ri bioplastik, me karakteristika pothuajse ideale: i nxjerrë nga celuloza, që është polimeri më natyral, ai kërkon vetëm ujë në temperaturën e dhomës plus një substancë të padëmshme, acid cinamik. Materiali mund të rimodelohet në dimensione të ndryshme pafundësisht.

Siç raportohet në “Nature Sustainability”, rezultati, i quajtur celulozë cinnamate, është një membranë jashtëzakonisht transparente, shumë rezistente, me performanca që shkojnë përtej atyre të disa prej lëndëve plastikave më të zakonshme të përftuara nga hidrokarburet, dhe mund të formësohen në 2 ose 3 dimensione thjesht duke përdorur ujin, domethënë duke e zhytur filmin, duke i dhënë formë dhe më pas duke e lënë të thahet. Bazuar në testet e raportuara, produktet e përftuara në këtë mënyrë tregojnë se mbeten pothuajse të pandryshuara për 16 muaj, edhe nëse vijnë nga materiali që është rimodeluar disa herë ndërkohë.

Sekreti i këtij materiali bioplastik qëndron në një lloj reaksioni kimik të quajtur hidrosetting, i cili shfrytëzon vetitë kimike-fizike të celulozës të modifikuar me cinnamate, dhe ato të ndërveprimeve me ujin. Përveçse është i riciklueshëm dhe nuk përdor hidrokarbure, ai gjithashtu nuk konsumon sasi të mëdha energjie në kohën e prodhimit, dhe kjo e bën atë një përbërës me karakteristika pothuajse ideale për një numër të pafund aplikimesh të mundshme.

Në fund të fundit, nevoja për të zhvilluar dhe shpërndarë bioplastikë miqësore me mjedisin është gjithnjë e më e dukshme dhe bëhet dramatikisht e qartë kur lindin situata të tilla si ajo në Tajvan. Në ishull, si në shumë vende të botës, për muaj të tërë ishte e ndaluar të haje në restorante dhe në kohë të caktuara të dilje jashtë, dhe kjo i ka dhënë një nxitje të madhe shitjes së ushqimit online dhe ushqimeve të gatshme. Por, përkundër faktit se atje, si kudo tjetër, shitja e sendeve dhe veglave plastike të disponueshme tani është e ndaluar, bizneset e vogla dhe restorantet individuale përjashtohen nga respektimi i këtyre rregullave, dhe për këtë ata kanë përdorur pak nga gjithçka. Rezultati ishte që, midis janarit dhe majit të këtij viti, vetëm në kryeqytetin Taipei, sasia e ambalazhit plastik të hedhur u rrit me 85%, dhe ajo e mbeturinave të përcaktuara si të riciklueshme të të gjitha llojeve u rrit nga 7 ton vitin e kaluar, në 10.7 ton këtë vit.