Këshilli i Lartë Gjyqësor në mbledhjen e datës 10 tetor ka vendosur një plan masash për sigurinë në gjykata pas vrasjes së gjyqtarit Astir Kalaja, duke kërkuar ndër të tjera ndryshimin e statutit të magjistratit.
Gazetari Arsen Rusta në një raportim për Mcn Live bën me dije:
“Vendimi i KLGJ ka elementë të rëndësishëm. Është diskutuar pajisja e të gjitha institucioneve dhe gjykatave me skanerin me metal-detektor, vendosjen e kamerave të sigurisë aty ku mungojnë. Ndryshimi i kuadrit ligjor, analizimi i informacioneve dhe praninë e trupës së sigurisë të trajnuar nga Policia e Shtetit, apo pjesë e Policisë së Shtetit. Kërkohet ndryshimi i ligjit për statusin e magjistratit. Nuk dihet çfarë kërkon ky grup institucional në ndryshimin ligjor, pajisjen e tyre me armë, apo shoqërimin me truproja shtesë. Duhet që në bashkëpunim me AKEP dhe AMA të monitorohen mediat për gjuhën e urrejtjes, rrjetet sociale, por edhe për postimet që mund të ndikojnë për cenimin e integritetit dhe figurës së magjistratëve”.
Lidhur me rritjen e sigurisë në gjykata, thuhet se u vendos:
“Marrja e informacionit lidhur me kushtet ekzistuese të shërbimit dhe të infrastrukturës së sigurisë në gjykata, pajisjen me skanera, detektorë, kamera sigurie, pajisje të tjera sigurie, si dhe funksionimin e tyre, në përputhje me aktet ligjore dhe nënligjore në fuqi, me qëllim standardizimin e procedurave dhe trajnimin e personelit për menaxhimin e situatave që lidhen me sigurinë”.
Sa i takon bashkëpunimit të KLGJ me AKEP dhe AMA për ndalimin e gjuhës së papërshtatshme ndaj gjyqtarëve në media dhe rrjete sociale, thuhet:
“Bashkëpunimin me AKEP dhe AMA, me qëllim marrjen e masave për ndalimin e gjuhës së papërshtatshme ndaj gjyqtarëve në rrjetet sociale, platformave online dhe media, informimin e këtyre institucioneve mbi situatën aktuale, si dhe duke kërkuar prej tyre marrjen e masave konkrete brenda kompetencave ligjore”.
Gjithashtu bëhet me dije se do të nisin procedurat për emërtimin e sallës së amfiteatrit në godinën “Poli i Drejtësisë” me emrin “Astrit Kalaja”, si dhe dërgimin e propozimit tek institucionet përkatëse, për dhënien e titullit “Dëshmor i Atdheut” gjyqtarit të rënë në krye të detyrës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
