Studimi: Depresioni pas lindjes mund të prekë të dy prindërit në të njëjtën kohë

Depresioni pas lindjes mund të prekë të dy prindërit në të njëjtën kohë.

Kjo është ajo që doli nga hulumtimi i ri nga University College London, i publikuar në Jama Network Open, i cili analizoi rezultatet e 23 studimeve për depresionin pas lindjes, një gjendje që shpesh godet brenda një viti nga lindja e fëmijës.
Konkretisht, studimi zbuloi se rreth një në 30 nëna dhe baballarë vuajnë nga depresioni pas lindjes.

Për të kryer studimin, ekipi hulumtues, i udhëhequr nga Kara Smythe, analizoi 23 studime, të kryera në 15 vende midis viteve 1990 dhe 2021, duke përfshirë Mbretërinë e Bashkuar dhe Shtetet e Bashkuara, me të dhëna për 29,286 çifte që kishin një shtatzëni të suksesshme.

Në secilin studim, shkalla e ankthit ose e depresionit  si tek nënat ashtu edhe tek baballarët u ekzaminua duke përdorur anketat dhe të dhënat mjekësore.

Duke krahasuar rezultatet, doli se rreziku i të dy prindërve që vuajnë nga depresioni në të njëjtën kohë duket se rritet pas lindjes së foshnjës. 

Konkretisht, rezultatet tregojnë se 1.72% e çifteve të përfshira në studim kanë vuajtur nga depresioni gjatë shtatzënisë. 

Përqindja u rrit në 2.37% në 12 javët pas lindjes së fëmijës dhe në 3.18% midis tre dhe 12 muajve pas lindjes. Duke ekzaminuar rrezikun që prindërit të vuajnë nga këto probleme në të njëjtën kohë dhe në kohë të ndryshme, u zbulua se 11% e nënave të reja përjetuan depresion gjatë shtatzënisë dhe 13% pas lindjes së foshnjës; ndërsa për baballarët këto përqindje ishin përkatësisht 9.76% dhe 8.75%.