“Vaksinimi masiv” me një infermiere në Qendrën Shëndetësore nr.1 në Tiranë

Me rritjen e numrit të të interesuarve për të marrë vaksinën Pfizer, është rritur edhe fluksi nëpër qendrat shëndetësore, kryesisht e të rinjve.

Në një vëzhgim të MCN TV, sot në qendrën shëndetësore nr.1 në Tiranë, mësuam se ka deri në 200 të interesuar ditorë për vaksinim me Pfizer Biontech, përderisa radhët e qytetarëve shtojnë orët e pritjes.

Në këtë qendër shëndetësore, operojnë me vetëm një infermiere për vaksinim, që e pamundëson shpejtësinë e procesit të vaksinimit. Shkas për këtë, sipas informacioneve tona, janë marrja e pushimeve të infermierëve dhe moszëvendësimi me të tjerë, për faktin se sipas tyre, ky fluks ka ardhur vetëm javën e fundit, pas interesimit për këtë lloj vaksine.

Me gjithë këtë, radhët e gjata dhe pritjet mbi katër orëshe për të marrë vaksinën, nuk justifikohen me numrin e paktë të infermierëve edhe pse në kohë pushimesh, sepse si e tillë nuk do të duhet të emërtohej si “vaksinim masiv” me vetëm një infermiere.

Deri në kohën kur Ministria e Shëndetësisë do të përshpejtoj zgjidhjen e këtij problemi, pamjet e radhëve të gjata në këto qendra shëndetësore, me gjasë do të vazhdojmë ti shohim çdo ditë.