Muzhaqi prezanton Programin e Ri të Kujdesit Dentar për fëmijët në shkolla

Ministrja e Shtetit për Rininë dhe Fëmijët, Bora Muzhaqi së bashkëu me ministren e Shëndetësisë dhe Mbrojtjes Sociale, Ogerta Manastirliu dhe ministren e Arsimit e Sportit, Evis Kushi, kanë prezantuar ditën e sotme Programin e Ri të Kujdesit Dentar për fëmijët në shkolla.

Prezantimin e këtij programi ministret e bënë në shkollën “Jeronim De Rada”. Muzhaqi tha gjatë këtij prezantimi se qëllimi  i ëktij projekti është t’iu plotësojmë nxënësve nevojat e tyre bazike, duke e konvertuar shkollën në një mjedis ku jo vetëm mësohet por edhe ofrohet përkujdes në shëndetin e tyre.

Jam e bindur që kjo punë fantastike që Ministria e Shëndetësisë ka bërë me përmirësimin dhe krijimin e këtyre laboratorëve dentarë me një cilësi kaq të lartë, do iu mundësojë fëmijëve të marrin përkujdes cilësor dentar.

Në shtator do ta zhvillojmë më tej konceptin e shkollave si qendër komunitare. Kjo me krijimin e kurseve të veçanta që të rinjtë do t’i ndjekin falas, në ambientet e shkollës, me një ekip të mirë profesionistësh.

Me fillimin e vitit të ri shkollor, ne do të investojmë në 100 laboratorë teknologjikë për t’iu ofruar të rinjve dhe fëmijëve mundësi jo vetëm në kujdesin shëndetësor por edhe në zhvillimin e aftësive të tyre në fushën e teknologjisë.

Programi i ri i Depistimit të Shëndetit dhe Kujdesit Dentar për Fëmijët është një investim i Ministrisë së Shëndetësisë  e cila ka mundësuar 10 kabinete të reja dentare për shkollat e Tiranës.

Duke iu ofruar fëmijëve të grupmoshës 6-14 vjeç përkujdes cilësor dentar, depistimin periodik, edukim shëndetësor për ruajtjen dhe kujdesin e dhëmbëve si dhe shërbime konkrete, si fluorizimi, pastrimi i gurëzave si dhe trajtimet urgjente apo mjekimet e patologjive të indeve të buta.

Më shumë se 11 mijë nxënës në këto 10 shkolla të kryeqytetit do të jenë përfituesit e parë të këtij shërbimi, për t’u shtrirë më pas në gjithë vendin.