Të hash çokollatë të paktën një herë në javë redukton rrezikun e sëmundjeve të zemrës. Sipas një studimi të botuar të martën në Revistën Evropiane të Kardiologjisë Parandaluese, një botim i Shoqatës Evropiane të Kardiologjisë (ESC), konsumi i çokollatës mban të shëndetshme enët e gjakut të zemrës.
Studiuesit kryen një analizë të detajuar të studimeve nga pesë dekadat e kaluara duke ekzaminuar lidhjen midis konsumit të çokollatës dhe sëmundjes së arterieve koronare (bllokimi i arterieve koronare). Analiza përfshin gjashtë studime me gjithsej 336 228 pjesëmarrës, që raportuan konsumin e çokollatës.
Përgjatë një monitorimi prej afro nëntë vjetësh, 14 043 pjesëmarrës në studim zhvilluan sëmundje të arterieve koronare dhe 4 667 patën atak në zemër (kur sëmundja e arterieve koronare përparon dhe qarkullimi i gjakut në zemër papritmas bllokohet).
Në krahasim me konsumimin e çokollatës më pak se një herë në javë, ngrënia e çokollatës më shumë se një herë në javë shoqërohet me një rrezik të zvogëluar prej 8% të sëmundjes së arterieve koronare.
Çokollata përmban lëndë ushqyese të shëndetshme në zemër, siç janë flavonoidet, metilksantinat, polifenolet dhe acidi stearik që mund të zvogëlojnë inflamacionin dhe të rrisin kolesterolin e mirë (lipoproteina me densitet të lartë ose kolesterol HDL).
Çokollata duket premtuese për parandalimin e sëmundjes së arterieve koronare, por studiuesit thonë se nevojiten më shumë hulumtime për të identifikuar sa dhe çfarë lloj çokollate mund të rekomandohet.
Megjithatë, edhe këtu vlen sensi i masës. Sasitë e moderuara të çokollatës i mbrojnë arteriet koronare, por ka të ngjarë që sasi të mëdha të mos e bëjnë të njëjtin efekt. Kaloritë, sheqeri, qumështi dhe yndyra në produktet komerciale duhet të merren parasysh, veçanërisht nga diabetikët dhe ata që janë mbipeshë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
