Rama padit Ramush Haradinajn për shpifje

Kryeministri Edi Rama ka ngritur padi ndaj homologut të tij nga Kosova, Ramush Haradinaj. Sipas padisë, të cilën e ka siguruar “Betimi për Drejtësi”, Rama pretendon se Haradinaj ka shpifur me deklaratat ndaj tij për shkëmbimet e territoreve dhe kërkon kompensim të dëmit. Padia është dorëzuar të mërkurën në Gjykatën Themelore në Prishtinë.

Në padi përmenden disa emisione të transmetuara tetorin e vitit të shkuar, në të cilat Haradinaj ka folur për këtë temë, e ku e ka akuzuar Ramën, që së bashku me Hashim Thaçin dhe Aleksandër Vuçiçin, kanë nisur idenë e shkëmbimit të territoreve ndërmjet Kosovës dhe Serbisë.

“Në datën 17.10.2019 e 29.10.2019, i Padituri Ramush Haradinaj, në kohën e kryerjes së deklaratës Kryeministër në detyrë i Republikës së Kosovës (më poshtë referuar edhe si “i Padituri”gjatë një interviste të dhënë gazetarit Artur Zheji e të publikuar në emisionin 360.gradë në datën 17.10.2019 si dhe gjatë intervistës së kryer në datën 29.10.2019 në emisionin televiziv Pressing/Zona Pressing të publikuar në televizionin “T7” të Republikës së Kosovës, ka kryer deklarim publik të fakteve shpifëse e mashtruese në adresë të Paditësit me pasojë cenimin e nderit, personalitetit, reputacionit dhe dinjitetit të Paditësit me pasojat e parashikuara në legjislacionin e zbatueshëm”, thuhet në padi.

Vetë Haradinaj e cilëson këtë lëvizje si një diversion politik. Në një mesazh të shpërndarë të mërkurën, Haradinaj thotë se padia e Ramës është tërësisht e pabazuar.  

REAGIMI I HARADINAJT

Sot është raportuar në media se Kryeministri i Shqipërisë Edi Rama ka deponuar padi kundër meje në Gjykatë.
Unë, sipas ligjit, do të përgadis përgjigje në padi, në afatet e përcaktuara ligjore!
Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë.
Kombi ynë dhe Kosova ka njerëz që i dalin zot në çdo kohë.