Kryedemokrati Sali Berisha e cilëson projektligjin e propozuar nga Partia Socialiste për ish-bashkëpunëtorët e Sigurimit të Shtetit, si ligj “anti-Meta” dhe se nëse e provojnë me të, vetëm sa do t’i rrisin hovin.
Në konferencën e sotme për mediat, Berisha deklaroi se Partia Demokratike gjatë periudhave të saj në pushtet ka miratuar dy ligje për lustracionin dhe se në praktikën botërore ligjet e dekriminalizimit janë tjetër dhe të lustracionit janë tjetër.
Në praktikën europiane dhe botërore, ligjet e dekriminalizimit janë tjetër, ligjet e lustracionit janë tjetër. Janë kategori të ndryshme. Me ligjet e lustracionit PD përjashtonte nga funksionet publike agjentët, informatorët e Sigurimit të Shtetit dhe nomeklaturën e lartë komuniste.
Ligji është vënë në zbatim në vitin 1996, është kopje e ligjit çeko-sllovak. Ky ligj u amendua nga socialistët në pushtet duke hequr komponentin lustracion. Për këtë arsye, PD në vitin 2008 miratoi në Parlament ligjin e lustracionit.
Në 1995 PD miratoi ligjin për dënimin e krimeve të komunizmit. Mbi bazën e këtij ligji u dënuan 73 zyrtarë nga Presidenti i Republikës te një komandant poste që zvarriti trupat e të rinjve të pushkatuar në kufi.
Ky ligj u quajt kushtues nga Gjykata Kushtetuese dhe është edhe sot në fuqi. Ne kemi qenë, jemi dhe do të jemi për ligjin e lustracionit, kjo nuk mund të ketë asnjë hezitim.
Atë që bën Partia Ssocialiste, duket se është një ligj po ta quajmë ligji anti-Meta, i cili bazohet në një shpifje të qartë të hedhur poshtë nga vetë autori për të cilin akuzohet zoti Meta.
Nëse PS është e gatshme të rikthejë ligjin e lustracionit, Autoriteti i hapjes së Dosjeve ekziston, nuk ka nevojë të ngrihet. Ne jemi për lustracionin.
Në vijim tha se nëse do të bëjnë një ligj anti-Berisha, “le ta provojnë, vrulli dhe hovi im do të rritet më shumë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
