Pranimi i Ukrainës në NATO do të ishte një fitore për Kievin, edhe nëse nuk arrin të rimarrë një pjesë të territorit që i ka humbur Rusisë, ka thënë kryeministrja e Estonisë Kaja Kallas. Blloku ushtarak i udhëhequr nga SHBA-ja ka përjashtuar në mënyrë eksplicite anëtarësimin e Ukrainës për sa kohë që konflikti i saj me Rusinë vazhdon.
I pyetur nga korrespondenti i BBC nëse Estonia ka një plan B në rast se “Ukraina e humb këtë luftë”, Kallas u përgjigj: "Ne nuk kemi plan B për një fitore ruse".
"Sepse atëherë ne do të ndalonim së fokusuari në planin A," tha ajo, duke iu referuar ndihmës ushtarake për Kievin. “Nuk duhet t'i dorëzohemi pesimizmit. Fitorja në Ukrainë nuk ka të bëjë vetëm me territorin,” argumentoi Kallas. “Nëse Ukraina i bashkohet NATO-s, edhe pa ndonjë territor, atëherë kjo është një fitore sepse ajo do të vendoset nën mburojën e NATO-s”.
Estonia është një nga avokatët më të zëshëm për të ndihmuar Kievin midis vendeve anëtare të NATO-s dhe ka dhuruar më shumë se 520 milionë euro ndihmë ushtarake për Ukrainën, e cila arrin në rreth 1.4% të PBB-së së saj.
Ukraina aplikoi zyrtarisht për t'u bashkuar me aleancën e udhëhequr nga SHBA në vitin 2022, por ende nuk ka marrë një udhërrëfyes ose plan kohor të qartë të pranimit. Sekretari i Përgjithshëm i NATO-s, Jens Stoltenberg, ka thënë se Ukraina nuk mund të bëhet anëtare derisa të zgjidhet konflikti i saj me Rusinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
