<p>Qeveria ka përcaktuar kriteret që duhet të përmbushë një komunitet i caktuar, për t’u njohur si pakicë kombëtare. Sipas një vendimi të marrë në mbledhjen e fundit të vitit 2024, kërkesa për njohjen si pakicë kombëtare paraqitet nga një grupim jo më i vogël se 1% e popullsisë me shtetësi shqiptare. <a href="https://www.kryeministria.al/newsroom/vendime-te-miratuara-ne-mbledhjen-e-keshillit-te-ministrave-date-26-dhjetor-2024/">Vendimi </a>parashikon që për shqyrtimin e kësaj kërkese të ngrihet një komision, i cili ka në përpbërje përfaqësues të disa ministrive, Drejtoria e Arkivave, Akademia e Shkencave, Komiteti për Pakicat Kombëtare dhe shoqëria civile.</p> <p><strong>V E N D I M</strong></p> <p><strong>PËR</strong></p> <p><strong>PËRCAKTIMIN E PËRBËRJES, FUNKSIONEVE DHE PROCEDURËS SË KOMISIONIT PËR SHQYRTIMIN E KËRKESËS PËR NJOHJEN E NJË PAKICE KOMBËTARE</strong></p> <p>Në mbështetje të nenit 100 të Kushtetutës dhe të pikës 3, të nenit 4, të ligjit nr.96/2017, “Për mbrojtjen e pakicave kombëtare në Republikën e Shqipërisë”, me propozimin e ministrit të Brendshëm, Këshilli i Ministrave</p> <p><strong>V E N D O S I:</strong></p> <p>1. Kërkesa për njohjen formale të një pakice kombëtare sipas pikës 1, të nenit 4, të ligjit nr.96/2017, “Për mbrojtjen e pakicave kombëtare në Republikën e Shqipërisë”, depozitohet nga grupi i shtetasve që përbëjnë mbi 1 % të numrit të përgjithshëm të shtetasve që kanë shtetësinë shqiptare në Republikën e Shqipërisë, të cilët pretendojnë se i përkasin një pakice. Kjo kërkesë paraqitet pranë Komisionit për Njohjen e Pakicave Kombëtare, i cili ngrihet pranë ministrisë përgjegjëse për punët e brendshme (në vijim referuar si “Komisioni”).</p> <p><img alt="Fibank" src="https://www.mcntv.al/sites/default/files/fibank8.gif"></p> <p>2. Dokumentacioni për njohjen formale të një pakice kombëtare përbëhet nga:</p> <p>a) kërkesa e nënshkruar nga çdo pjesëtar i grupit që pretendon se i përket pakicës kombëtare që synohet të njihet;</p> <p>b) formulari individual i vetëdeklarimit për secilin nga shtetasit që kanë firmosur sipas shkronjës “a”, për njohjen e statusit të pjesëtarit të pakicës kombëtare, sipas aneksit 1, bashkëlidhur këtij vendimi.</p> <p>3. Komisioni kryesohet nga zëvendësministri i ministrisë përgjegjëse për çështjet e brendshme dhe ka në përbërje:</p> <p>a) një përfaqësues nga Drejtoria e Përgjithshme e Gjendjes Civile, në ministrinë përgjegjëse për gjendjen civile;</p> <p>b) një përfaqësues nga ministri përgjegjës për pushtetin vendor;</p> <p>c) një përfaqësues nga ministria përgjegjëse për çështjet e brendshme, përgjegjës për çështjet ligjore;</p> <p>ç) një përfaqësues nga ministria përgjegjëse për mbrojtjen sociale;</p> <p> d) një përfaqësues nga ministria përgjegjëse për punët e jashtme;</p> <p>dh) një përfaqësues nga ministria përgjegjëse për trashëgiminë kulturore;</p> <p>e) një përfaqësues nga Drejtoria e Përgjithshme e Arkivave;</p> <p>ë) një përfaqësues nga Akademia e Shkencave;</p> <p>f) një përfaqësues nga Instituti i Historisë, në Akademinë e Shkencave;</p> <p>g) katër përfaqësues nga Komiteti për Pakicat Kombëtare, ku njëri prej tyre është përfaqësues i pakicës kombëtare që kërkon të njihet, sipas rastit;</p> <p>gj) tre përfaqësues nga shoqëria civile, të propozuar nga Komiteti për Pakicat Kombëtare, nga radhët e organizatave joqeveritare që veprojnë në fushën e të drejtave të njeriut, përfshirë mbrojtjen e të drejtave të personave që i përkasin pakicave kombëtare.</p> <p>4. Komisioni, për kryerjen e veprimtarisë së tij mbështetet nga sekretariati teknik, i cili është përgjegjës për organizimin e punës, të sigurojë komunikimin me paraqitësit e kërkesave, të koordinojë punën mes institucioneve përgjegjëse, si dhe për çdo detyrë tjetër të nevojshme për mbarëvajtjen e aktivitetit të Komisionit.</p> <p>5. Sekretariati teknik kryesohet nga një nga përfaqësuesit e ministrisë përgjegjëse për çështjet e brendshme dhe ka në përbërje katër anëtarë, si më poshtë vijon:</p> <p>a) Dy përfaqësues të caktuar nga titullari i ministrisë përgjegjëse për punët e brendshme;</p> <p>b) Një përfaqësues i caktuar nga titullari i ministrisë përgjegjëse për çështjet vendore;</p> <p>c) Një përfaqësues i caktuar nga titullari i Komitetit për Pakicat Kombëtare.</p> <p>6. Përfaqësuesit e institucioneve të përcaktuara në pikën 3, të këtij vendimi, janë të nivelit të lartë drejtues.</p> <p>7. Komisioni shqyrton kërkesën e paraqitur sipas pikës 1, të këtij vendimi, dhe verifikon plotësimin e kritereve ligjore të përcaktuara në pikën 1, të nenit 3, të ligjit nr.96/2017, “Për mbrojtjen e pakicave kombëtare në Republikën e Shqipërisë”, dhe dokumentacionin e paraqitur sipas parashikimeve të neneve 6 dhe 7, të këtij ligji.</p> <p>8. Komisioni shqyrton kërkesën e paraqitur sipas pikës 1, të këtij vendimi, brenda 9 (nëntë) muajve nga dita e pranimit nga ministria përgjegjëse për çështjet e brendshme.</p> <p>9. Për shqyrtimin e kërkesës, Komisioni bashkëpunon me të gjitha institucionet publike në nivel qendror, sipas rregullave të përcaktuara në vendimin nr.867, datë 10.12.2014, të Këshillit të Ministrave, “Për procedurat e bashkëpunimit në institucionet e administratës shtetërore”, të ndryshuar.</p> <p>10. Vendimi arsyetohet dhe i komunikohet grupit të shtetasve apo përfaqësuesit të autorizuar prej tyre, në përputhje me parashikimet e Kodit të Procedurave Administrative. Kundër vendimit të Komisionit për refuzimin e kërkesës për njohje të pakicës kombëtare mund të bëhet ankim pranë gjykatës kompetente për zgjidhjen e mosmarrëveshjeve administrative.</p> <p>11. Komisioni garanton transparencë në realizimin e veprimtarisë së tij, në përputhje me ligjin nr.119/2014, “Për të drejtën e informimit”, dhe programin e transparencës, duke i publikuar aktivitetet e tij në faqen zyrtare të ministrisë përgjegjëse për çështjet e brendshme.</p> <p>12. Në rastet kur Komisioni vendos pranimin e kërkesës, i dërgon ministrit përgjegjës për çështjet e brendshme propozimin, shoqëruar me relacionin e argumentuar për vijimin e procedurave për njohjen formale të pakicës kombëtare.</p> <p>13. Ministria përgjegjëse për çështjet e brendshme harton projektligjin për njohjen formale të pakicës kombëtare dhe propozon projektvendimin përkatës pranë Këshillit të Ministrave, brenda 60 (gjashtëdhjetë) ditëve nga paraqitja e propozimit nga Komisioni.</p> <p>14. Ngarkohen ministria përgjegjëse për çështjet e brendshme, ministritë dhe institucionet e parashikuara në pikën 3 për zbatimin e këtij vendimi.</p> <p>Ky vendim hyn në fuqi pas botimit në “Fletoren zyrtare”.</p>
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
