Kreu i PD-së, Lulzim Basha, akuzoi dje policinë e Fierit për heshtje ndaj një rasti pengmarrjeje të një qytetari. Sipas postimit të djeshëm të Bashës në rrjetin social, i cili i referohej denoncimit anonim të një efektivi policie në Fier, Renato Çami, financues dhe mbështetës i PS-së në këtë qytet, ka rrahur dhe marrë peng për 3 ditë një qytetar, ndërsa policia e ka fshehur këtë fakt.
Por, në reagimin e saj, policia e Fierit thotë se vërteta qëndron krejt ndryshe.
Sqarimi i policisë në lidhje me ngjarjen:
Në lidhje me statusin e publikuar nga Kryetari i Partisë Demokratike në rrjetin social ‘Facebook’ ku akuzohet Policia e Fierit për fshehjen e një ngjarjeje, informojmë se ngjarja në fjalë nuk është fshehur, por sipas procedurës standarde të punës është publikuar dhe mund të gjendet lehtësisht si çdo njoftim tjetër në faqen zyrtare online të Policisë së Shtetit.
Konkretisht, ngjarja e pasqyruar në ueb “Më datë 03.10.2017 u referuan materialet në Prokurorinë e Rrethit Gjyqësor Fier, për veprën penale “Heqje të paligjshme të lirisë” parashikuar nga neni 110/2 i Kodit Penal, si dhe po punohet për identifikimin dhe kapjen e autorëve, pasi më datë 03.10.2017 është paraqitur dhe ka bërë kallzim shtetasi F.L., 20 vjeç, banues në fshatin Petovë Fier, se në datë 02.10.2017, në lagjen “1 Maj” Fier është rrahur nga disa persona dhe është mbajtur peng për disa orë në një banesë”.
Policia e Shtetit është e vendosur të kryejë detyrën me përgjegjësi e seriozitet dhe të ndëshkojë çdo paligjshmëri e këdo që shkel ligjin. E për këtë arsye, Policia e Shtetit fton çdo qytetar dhe parti politike të kërkojë informacion duke u garantuar përgjigje në kohë, për të shmangur pasaktësitë në mos abuzimet me faktet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
