Kuvendi i Kosovës ka miratuar rezolutën për gjenocidin serb.
Nga 79 deputetët të cilët ishin të pranishëm në seancë, të gjithë votuan pro miratimit të kësaj rezolute.
Votimi u parapri nga publikimi i dy fotove, të cilat tregojnë rastin e përdhunimit të një gruaje kosovare nga paramilitarët serbë në sytë e familjarëve nën kërcënimin e armës dhe trupin e pajetë të një vajze 7-vjeçare, gjithashtu viktimë e dhunës së forcave serbe.
Fotot u publikuan nga deputetja e PDK-së, Flora Brovina. Në lidhje me këtë reagoi Prokuroria Speciale, që njoftoi se nuk ka qenë në njohuri për rastin e përdhunimit që shfaqet në fotografi, për të cilin do të hapet një hetim.
“Prokuroria Speciale njofton që vetëm pas publikimit të fotos nga deputetja Brovina, e ka kuptuar për ekzistencën e kësaj dëshmie, pasi deri me tani për një fotografi të tillë nuk kemi pasur informata, as nga deputetja Brovina e as nga dikush tjetër”, thuhet në reagimin e Prokurorisë.
Ndërkohë, publikimi i fotove ndau edhe opinionin. Ish-presidentja e Kosovës, Atifete Jahjaga, e cilësoi të neveritshëm e jonjerëzor pubikimin e fotove.
“Të mbijetuarit e dhunës seksuale gjatë luftës në Kosovë nuk janë vegla që mund t’i përdorni për spektaklet e juaja politike,” thuhet në reagimin e Jahjagës.
Shkelje të dinjitetit të të mbijetuarave të dhunës seksuale të luftës në Kosovë, e ka konsideruar edhe Rrjeti i Grave të Kosovës, që u ka bërë thirrje deputetëve të kërkojnë përgjegjësi nga gjykatat për mungesë të trajtimit dinjitoz të rasteve të këtilla.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
