“Ideja për shkëmbimin e territoreve u hodh në darkën e Edi Ramës në Beograd”

Ideja për shkëmbimin e territoreve mes Kosovës dhe Serbisë është hedhur për herë të parë në vitin 2016, gjatë një darke në Beograd, ku ishte i pranishëm kryeministri Edi Rama. Avokati dhe opinionisti Dastid Pallaska në Kosovë thotë se për herë të parë idenë e ka hedhur ministri i Jashtëm i Serbisë, shkruan sot gazeta “Zëri”.

“Përderisa në vitin 2016 opinioni në Kosovë mirëpriti kërkesën publike të kryeministrit të Shqipërisë drejtuar kryeministrit të Serbisë, që Serbia të njohë Kosovën, pakkush e ka ditur se ndarja e Kosovës për herë të parë u diskutua në darkën private që kryeministri i Shqipërisë kishte me udhëheqjen serbe po të njëjtën ditë, ku propozimi për ndarje u prezantua nga ministri i Jashtëm i Serbisë. Dy vjet më vonë, kjo ide depërtoi pothuajse në secilën qendër të rëndësishme të vendimmarrjes”, shprehet Pallaska në një intervistë.

“Ekzibicionistët politikë si kryeministri i Shqipërisë, që për pak vëmendje dhe mbijetesë politike sakrifikojnë edhe interesat kombëtare, duhet ta kuptojnë se e vetmja mënyrë për të gjithë shqiptarët të jetojnë brenda kufijve të tyre historikë është Bashkimi Evropian pa kufij”, shton ai.