Kreu i PD-së, Lulëzim Basha, u premtoi sot shqiptarëve nga të dyja anët e kufirit, heqjen e traut në Rrugën e Kombit që nga dita e parë e qeverisjes. Një premtim i tillë për gazetarin e ekonomisë, Klodian Tomorri, është i paqartë. Kjo sepse Basha nuk sqaron se si do të paguhet dëmi i prishjes së kontratës. Rasti sipas Tomorrit, nëse premtimi mbahet, do t’i ngjante koncesionit të skanimit në dogana, i dhënë nga qeveria “Berisha” në fund të mandatit të saj.
PD nuk ka dhënë asnjë sqarim si do ta realizojë këtë premtim. Qeveria e ka të gjithë tagrin për ta prishur kontratën. Por çdo kontratë e prishur sjell dëmin që paguhet nga ai që e prish. Në rastin e koncesionit Durrës-Kukës kemi një kontratë koncesioni 25-vjeçare dhe në rast se qeveria e PD do të marrë vendimin për të hequr traun, e gjithë kostoja e 25 viteve do të paguhet nga buxheti. Atë që sot e paguajnë kalimtarët përmes taksës te trau, do ta paguajë qeveria nga buxheti. E njëjta gjë që u bë me koncesionin e skanimit në dogana, që u dha nga PD para zgjedhjeve të 2013-s dhe për çdo deklaratë doganore, bizneset paguanin tarifë 20-40 euro për kompaninë koncesionare. Qeveria socialiste e hoqi tarifën dhe e paguan nga buxheti i shtetit, gati 13 milionë euro në vit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
