Përfundimi i mandatit të Holta Zaçaj, Asim Vokshi drejt Kushtetueses/ Renditet i pari (VIDEO)

Gjyqtari i Gjykatës së Lartë Asim Vokshi është një hap pranë Gjykatës Kushtetuese, pasi nga testimi është renditur i pari mes gjashtë kandidatëve, duke marrë pikët më të larta.

Pas tij kanë mbetur ish-drejtuesit e komisioneve të vetingut. Vokshi pritet të zërë vendin e gjyqtares Holta Zaçaj të cilës i përfundon mandati në Kushtetuese dhe javën që vjen do të largohet nga detyra.

Në zbatim të nenit 239 të ligjit nr. 115/2016 dhe Vendimit nr. 5 datë 02.04.2019 “Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, Këshilli i Emërimeve në Drejtësi do të miratojë edhe Raportin e arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes përfundimtare të tyre, me qëllim dërgimin e tij më pas te organi i emërtesës, Gjykata e Lartë.

1) Asim Vokshi   89.5 pikë;

2) Naureda Llagami  89.3 pikë;

3) Florjan Ballhysa  77.83 pikë;

4) Alma Faskaj  77.77 pikë;

5) Genta Tafa (Bungo)  75.44 pikë;

6) Alban Toro   74.22 pikë.

Holta Zaçaj u zgjodh kryetare në vitin 2023 si anëtarë e Gjykatës Kushtetuese, ku zëvendësoi Vitore Tushën. Por mosmarrëveshjet lindën për shkak të kohëzgjatjes së mandatit, ku Gjykata e Lartë argumentoi se mandati i Zaçaj mbaronte në mars 2025, ndërsa kjo e fundit kërkonte që detyra e saj të mbyllej në fund të vitit. 

Në fund më shumicë votash Gjykata Kushtetuese përcaktoi pranverën e këtij viti si afat të përfundimit të mandatit për kryetaren ekzistuese.