Komisioni i Ankimimeve dhe Sanksioneve ka hedhur poshtë pretendimin e Partisë Demokratike, Lëvizjes Socialiste për Integrim dhe kandidatit të pavarur Kreshnik Merxhani, për të shpallur të pavlefshëm rezultatin e zgjedhjeve në Qarkun Gjirokastër.
Ky vendim u mor me shumicë votash, 3-2. Anëtarët kundër rrëzimit ishin Ledio Braho dhe Elvis Cefa.
Pretendimet e hedhura nga palët lidhen me pavlefshmërinë e votave në qarkun Gjirokastër.
Altin Kaziaj, përfaqësuesi i LSI në Komisionin Qendror të Zgjedhjeve, kërkoi shpalljen të pavlefshme të zgjedhjeve në Bashkinë Dropull, për rrjedhojë edhe shpalljen të pavlefshëm të rezultatit në të gjithë qarkun.
Ndërsa përfaqësuesi i PD, Marash Logu, tha se ministri i Brendshëm, Bledar Çuçi, në bashkëpunim me Aranit Arapin dhe Ermir Gërxhanin, kishin ngritur një strukturë kriminale të blerjes së votave, përmes parave, ndihmave, por edhe kërcënimeve.
Kreshnik Merxhani, kandidati i pavarur në Gjirokastër tha se “është provuar me pamje filmike që anëtarët e grupit të numërimit, në bashkëpunim edhe me anëtarë të KZAZ, kanë ndërhyrë në tjetërsimin e votës”.
“Për këtë manipulim ka pasur një miratim në heshtje e anëtarëve të KZAZ, e vërtetuar shumë qartë nga pamjet filmike”.
Partitë opozitare kërkonin që në Qarkun e Gjirokastrës të kishte rinumërim dhe rivotim, por diçka e tillë u hodh poshtë me tri vota pro dhe dy kundër.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
