Protesta e opozitës për dosjen 5D/ Policia plan masash dhe bllokim rrugësh

Ditën e sotme është parashikuar të mbahet protesta e radhës para Bashkisë së Tiranës lidhur me aferën 5D.

Lidhur me këtë Policia e Shtetit ka marrë masa organizative dhe operacionale për garantimin e rendit publik dhe sigurisë gjatë zhvillimit të tubimit të kërkuar nga "Aleanca për Mbrojtjen e Teatrit" teksa ka bërë hirrje për të respektuar ligjin duke u distancuar dhe nga dhuna.

Në zbatim të planit të masave, Policia e Shtetit njofton se, sot, prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.

Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime.

Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore.  Policia përsërit thirrjen për organizatorët, drejtuesit dhe pjesëmarrësit në tubime për të respektuar ligjin dhe për t'u distancuar nga çdo akt dhune.