Presidenti amerikan, Donald Trump, do ta zgjasë edhe një vit ekzekutimin e urdhrit mbi sigurinë kibernetike që njihet si Urdhri Ekzekutiv 13694. Ky urdhër i jep kompetenca qeverisë amerikane për të vendosur sanksione ndaj personave dhe organizatave të angazhuara në sulme kibernetike kundër SHBA-ve.
Urdhri në fjalë është lëshuar fillimisht me 1 prill 2015 nga presidenti i atëhershëm, Barack Obama, dhe afati i tij ishte përcaktuar të skadonte të shtunën e kësaj jave. Por presidenti Trump i është drejtuar dje me një letër Kongresit Amerikan, të cilin e informon për vendimin për të zgjatur në kohë zbatimin e këtij ligji.
“Disa aktivitete keqdashëse të organizatave jashtë SHBA-ve vijojnë të përbëjnë një rrezik të madh për sigurinë kombëtare, politikën e jashtme dhe ekonominë e Amerikës”, thuhet në letrën e dërguar nga presidenti Trump.
“Për këtë arsye, kam vendosur se është e nevojshme të vijojmë me gjendjen e emergjencës kombëtare të deklaruar përmes urdhrit ekzekutiv 13694 në lidhje me veprimtarinë kibernetike keqdashëse”, thuhet më tej.
Në dhjetor 2016, ky urdhër u vu në zbatim për të vënë sanksione ndaj agjentëve dhe organizatave ruse për dyshimet lidhur me rolin e tyre në sulmet kibernetike në zgjedhjet presidenciale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
