Çipa: Durrësi, me risk të lartë të inkriminimit zgjedhor. Grupet e kanë nisur punën më herët (VIDEO)

Analisti Aleksandër Çipa tha në MCN Live që Durrësi është një qark me risk të lartë të inkriminimit të procesit zgjedhor. Sipas analistit, ndryshe nga zgjedhjet e vitit 2021, në këto zgjedhje grupet kriminale s’do aktivizohen dy javëshin e fundit, por e kanë nisur më herët punën dhe ndarjen e zonave të influencës. 

“Ndryshe nga 2021-shi kjo është një fushatë që për shkak të sistemit ofron disa modele që kanë qenë të munguara, modeli i parë është kjo që po marr rastin e kandidatit Kalaja, që karakterizohet nga një fushatë pozitiviste, që adreson problematika që janë të mbartura në kalendat e burokracisë vendore.

E dyta nuk ofron një konfliktualitet verbal apo politik në marrëdhënie me kundërshtarët dhe rivalët. Distancohet përmes parimit ose logjikës së mos afrimit me korrupsionin zgjedhor, që e evidenton te kundërshtarët, marrëdhënien me inkriminimin zgjedhor. Ne e dimë që Durrësi është një qark i stigmatizuar si vend me risk të lartë të inkriminimit të procesit zgjedhor.

E para sepse ekzistojnë grupe kriminale, grupet e interesit të lidhura me grupet kriminale janë më të fuqishme. Ka edhe një specifikë tjetër, ndryshe voton qyteti, ndryshe periferia, ndryshe Kruja, ndryshe Fushë-Kruja. Rasti i Aulon Kalasë sjell edhe profilin intelektual edhe pastërtinë e përfaqësimit”.

Ai u shpreh ndër të tjera se përfshirja e disa gazetarëve në politikë si kandidatë për deputet, jep shpresë. 

“Përfshirja e gazetarëve në politikë jep shpresë. Do t’u bëja thirrje qytetarëve që këto figura, majtas-djathtas, kudo të jenë, t’i votojnë, e para sepse sjellin një ligjërim publik të cilësishëm mbartin kurajon dhe aftësinë e artikulimit publik, që janë të munguara edhe në skenën politike. E treta janë njerëz që kanë ndërtuar karrierën duke qenë në komunikim ditor me qytetarët. E bëj në mënyrë më të sinqertë apelin mbështetjen për gazetarët që kërkojnë mandatin e deputetit”.