Ulja e pragut zgjedhor në 1%, një nga ndryshimet e Kodit Zgjedhor që u miratuan sot në Parlament, penalizon partitë e vogla. Në studion e TvT, eksperti i çështjeve zgjedhore, Kristaq Kume, tha se pavarësisht se në disa rajone, partitë e vogla mund të kenë mbështetje të gjerë, ato do të pengohen nga pragu i ri, në rrugën drejt hyrjes në Parlament.
“Nëse mbajmë parasysh se si dhe çfarë ka ndodhur në proceset zgjedhore, një kushtëzim i tillë në nivel kombëtar dënon partitë e vogla, të cilat në rajone të caktuara mund të kenë forcë elektorale që bëjnë të mundur marrjen e një mandati”, tha ai.
Duke iu referuar zgjedhjeve të fundit, Kume tha se pasojat do të bien mbi PDIU-në.
“Po qe se u referohemi zgjedhjeve të kaluara, nga kjo preket vetëm një parti, PDIU. Të tjerat kanë marrë shumë më pak se 1 %. E gjitha është bërë për t’i eliminuar nga llogaritjet dhe duke e bërë këtë, është njësoj sikur të mos jetë votuar fare për to dhe fitojnë partitë e mëdha si PD, PS, LSI”, tha ai.
Lidhur me numrin e votave të mjaftueshme për një mandat, Kume tha se kjo varion nga qarku në qark, në varësi të numrit të mandateve që ka secili.
“Ka qenë me 10-11 mijë vota zgjedhjet e 2017, por edhe me 7 mijë. Sa më shumë mandate të ketë qarku, aq më i vogël është pragu. Në sistemet proporcionale rajonale, procesi zgjedhor është i mbyllur brenda rajonit. Është vetë rajoni ai që përcakton pragun rajonal”, tha ai.
Kandidimi i kryetarit të një partie në 4 qarqe, njëri prej propozimeve të fundit që PS çoi në Parlament, për Kumen është një hap mbrapa. Ai solli përvojën e ngjashme të vitit 2009 dhe vërejtjen e OSBE-ODIHR dhe Komisionit të Venecias për një dispozitë të tillë.
“Është një hap mbrapa në legjislacionin shqiptar. Është një histori e konsumuar. Në Kodin Zgjedhor në 2008 ka pasur një dispozitë që i jepte kryetarit të drejtën të kandidonte në 12 qarqe. Në mars 2009, OSBE dhe Komisioni i Venecias e cilësuan se binte ndesh. Në 2012, kjo dispozitë u hoq. Shkaqet nuk duhet të kërkohen në atë që është deklaruar. Pse nuk duhet të kërkojet mund të shpjegohet me atë që tha Rama: unë jam kryetar i partisë dhe do të jem në 12 njësitë zgjedhore të republikës. Ajo që unë pres të ndodhë nesër është të ripërsëritet vërejtja e këtij ndryshimi mospajtues me rekomandimin për ta hequr. Ndoshta i shërben një kompromisi të bërë për arsye politike”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
