Ahmetaj: Pagat e mësuesve do të rriten me 10%

Ministri i Financave, Arben Ahmetaj, thotë se rritja e pagave dhe pensioneve dy vitet e fundit nuk lidhet me rritjen e borxhit publik.

“Dua të sqaroj një thashethem për të krahasuar rritjen e pagave dhe pensioneve në të kaluarën. Rritjet e mëparshme janë bërë me para borxhi. Ata kanë krijuar borxh në kurriz të fëmijëve. Është hera e parë që rritja e tyre nuk krijon borxh.  Ka një indikator fiskal që quhet balanca primare. Kur është negative, qeveria ka krijuar borxh. Kjo qeveri është në vitin e dytë që jo vetëm krijon borxh të ri me operacionet e veta po krijon suficit”, tha Ahmetaj.

Ahmetaj tha se pagat e mësuesve do të rriten me 10 %, një rrijet që sipas tij për herë të parë do të jetë reale. “Rritja mesatarisht do të jetë 10 për qind. Për herë të parë do të kalojë në rritje reale dhe jo gënjeshtër”, tha ai.