VKM/ Hapet pika e kalimit kufitar në Aeroportin Ndërkombëtar të Vlorës

Me vendim të Këshillit të Ministrave është hapur pika e kalimit kufitar në Aeroportin Ndërkombëtar të Vlorës, me qëllim qarkullimin ndërkufitar ajror të shtetasve. Disa ministri do të angazhohen për zbatimin e vendimit në fjalë. Më 8 maj të këtij viti në Aeroportin e Vlorës zbriti avioni i parë testues, por ende s'kanë përfunduar punimet për t'i hapur rrugë operimit normal të trafikut ajror. 

V E N D I M

PËR

HAPJEN E PIKËS SË KALIMIT KUFITAR NË AEROPORTIN NDËRKOMBËTAR TË VLORËS

Në mbështetje të nenit 100 të Kushtetutës dhe të pikës 1, të nenit 8, të    ligjit nr.71/2016, “Për kontrollin kufitar”, të ndryshuar, me propozimin e ministrit të Brendshëm, Këshilli i Ministrave

V E N D O S I:

1. Hapjen e pikës së kalimit kufitar në Aeroportin Ndërkombëtar të Vlorës për qarkullimin ndërkufitar ajror të shtetasve.

2. Ngarkohen Ministria e Brendshme, Ministria e Infrastrukturës dhe Energjisë, Ministria e Financave dhe Ministria e Bujqësisë dhe Zhvillimit Rural për zbatimin e këtij vendimi.

Ky vendim hyn në fuqi pas botimit në “Fletoren zyrtare”.