Serbia do të vazhdojë të ndjekë anëtarësimin në Bashkimin Europian dhe të ruajë miqësinë me Rusinë, i tha Presidenti serb Aleksandar Vuçiç, homologut rus Vladimir Putin në një telefonatë.
Presidenti rus Vladimir Putin e uroi Presidentin serb Aleksandar Vuçiç për fitoren e tij bindëse në zgjedhjet presidenciale dhe për suksesin e rëndësishëm që Partia Progresive Serbe arriti në zgjedhjet parlamentare, duke pohuar se Serbia dhe Rusia do të mbajnë marrëdhënie vërtet miqësore. Presidenti Vuçiç e falenderoi për urimet, duke deklaruar se Serbia do të mbajë lidhje të sinqerta dhe tradicionalisht miqësore me Rusinë, ndërsa synon anëtarësimin në BE.
Kështu thuhet në deklaratën e shpërndarë nga mediat shtetërore ruse, raporton Tass.
Putin gjithashtu e informoi Vuçiç për zhvillimet në Ukrainë dhe arsyet e operacionit special të Rusisë në Ukrainë. Nga ana e tij Presidenti Vuçiç përsëriti qëndrimin e Serbisë dhe konkluzionet e Këshillit të Sigurisë Kombëtare, si dhe shprehu shpresën se konflikti në Ukrainë do të përfundojë në të ardhmen e afërt, shtohet në deklaratë, raporton Tass.
Vuçiç tha në një konferencë për shtyp më 3 prill, se Serbia do të mbetet ushtarakisht neutrale dhe gjithashtu do të kërkojë që të mbajë partneritet dhe marrëdhënie miqësore me Rusinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
