Autori i plagosjes në Orikum në arrati, shpallet në kërkim dhe një tjetër i përfshirë në ngjarje

Vijon të jetë në arrati autori i plagosjes së ndodhur mbrëmjen e së dielës në Orikum, ku u qëllua me armë zjarri 29-vjeçari Sildi Velaj.

Gjithashtu është shpallur në kërkim dhe një person i dytë, kushëriri i autorit, i dyshuar si i përfshirë në ngjarje.

Policia njofton se rreth orës 18:40 të së dielës në ambientet e lokalit të një karburanti në Orikum, dyshohet se pas një konflikti për motive të dobëta, Qerim Bello, 28 vjeç, ka qëlluar me armë zjarri duke plagosur Sildi Velaj, 29 vjeç, banues në Orikum.

I dëmtuari është transportuar në Spitalin e Traumës në Tiranë për mjekim të specializuar.

Nga hetimet e kryera deri tani, është identifikuar dhe shpallur në kërkim edhe bashkëpunëtori i autorit të dyshuar, Emiljano Bello, 36 vjeç, banues në Orikum.

Policia po vijon intensivisht punën për kapjen e tyre, si dhe për zbardhjen dhe dokumentimin e plotë të ngjarjes.

Theksohet se detaje të tjera mbeten pjesë e hetimit, që po kryhet nën drejtimin e Prokurorisë Vlorë.