“Më informoni për kontrollin e zyrtarëve”. Shalsi kërkon publikimin e “planit” e auditimit të KLSH-së

<p>Raportet e Auditimit të Kontrollit të Lartë të Shtetit, të bëra shkak shpeshherë për përfundimin e zyrtarëve të lartë në dyert e SPAK, janë kthyer në objekt debati këtë të martë në Komisionin e Ekonomisë.</p> <p>Teksa shqyrtohej draft-rezoluta për vlerësimin e veprimtarisë vjetore të këtij institucionin që ka identifikuar me qindra abuzime në tendera e PPP, kryetari i&nbsp;Komisionit të Ekonomisë, Eduart Shalsi, kërkon që KLSH t’i dorëzojë atij listën e institucioneve që do të auditojë, duke bërë kësisoj publik planin e punës.</p> <p>"<em>Plani duhej bërë publik para se të miratohej. Pse është audituar? Ta dimë kush institucion auditohet", </em>tha&nbsp;Eduart Shalsi<em>.</em></p> <p>"<em>Të&nbsp;shpallet publikisht plani. Se s’keni gjë&nbsp;për të fshehur. Do shkoj të kontrolloj dhe kaq", </em>tha deputeti Erion Braçe<em>.</em></p> <p>Të tjera shqetësime për të cilat socialistët ndanin të njëjtat bindje, ishin edhe afatet e zgjatura të auditeve.</p> <p>"<em>Keni bërë&nbsp;auditime përtej afatit. Pse? Bëni raporte, pse", </em>tha Shalsi<em>.</em></p> <p>"<em>Kohëzgjatja, unë&nbsp;funksionoj me info, jo me spiunë.&nbsp;10 muaj në&nbsp;një drejtori? Çfarë&nbsp;bën? 10 muaj? Çfarë&nbsp;bën? Apo drejtori, di drejtorin tjetër atje matanë", </em>tha Braçe<em>.</em></p> <p>Por edhe mes mazhorancës, kishte ligjvënës që e konsideruan si të padrejtë dhe shqetësuese ndërhyrjen në punën e KLSH.</p> <p>"<em>Cenim i punës, kontrollit por edhe hetimit", </em>tha Frrok Gjini<em>.</em></p> <p>"<em>Nuk gjykohen institucionet e pavarura, s'i themi dot që&nbsp;është&nbsp;i korruptuar. Se i bie hajde ndryshojme ligjin. Ia heqim këto kompetenca", </em>tha Alban Xhelili.&nbsp;</p> <p>I vetmi deputet opozitar në Komision, Arbi Agalliu u shpreh me nota të buta kundrejt pretendimeve të mazhorancës, megjithatë kërkoi që të ndalohen presionet ndaj institucionit.</p> <p>"<em>Të shmangim diskutimet të cilat kanë të bëjnë me raste të veçanta, të cilat mund t'i nxjerrim edhe jashtë kontektit, por thelbi të mbetet te zbatimi i ligjshmërisë te KLSH. KLSH I pavarur. Të&nbsp;hiqet dorë&nbsp;nga presioni ndaj këtij institucioni", </em>tha Agalliu<em>.</em></p> <p>Zëri i KLSH-së u bë edhe më i fortë në arenën politike dhe atë të drejtësisë, me denoncimet e institucionit pas gjetjeve dhe paralajmërimeve në Spitalin Onkologjik apo denoncimeve për pronat shtetërore që jepeshin duke shkelur ligjet. Nevojën për moscënim të pavarësisë së institucionit që drejton e shprehu pak ditë më parë vetë kreu i&nbsp;KLSh-së në një takim të thirrur nga kryeparlamentarja Spiropali në prani edhe të partnerëve ndërkombëtarë.</p> <p>&nbsp;</p> <iframe width="560" height="315" src="https://www.youtube.com/embed/ylIOOjKoGJI?si=Ou46I7sENCOcoj1b" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>