Nuk ka asnjë tregues që AstraZeneca shkakton mpiksje gjaku! Agjencia Evropiane e Barnave: Vazhdoni vaksinimin

Rregullatorët e BE-së hodhën poshtë dje frikën e mpiksjes së gjakut pas vaksinimit nga AstraZeneca, që bëri 14 vende evropiane të pezullonin injektimin e kësaj vaksine.

Agjencia Evropiane e Barnave (EMA) tha se nuk ka prova se vaksina shkakton efekte anësore të rrezikshme. Ajo bëri thirrje që vaksinimi me AstraZeneca duhet të vazhdojë, duke u bashkuar me OBSH-në dhe qeverinë e Mbretërisë së Bashkuar në mbrojtje të vaksinës, ndërsa shumë nga vendet e BE-së përfshirë Francën dhe Gjermaninë e pezulluan.

Ekspertët e sigurisë së EMA-së thonë se, “një numër shumë i vogël i njerëzve kanë pasur çrregullime të gjakut, por nuk ka asnjë indikacion që këto ishin shkaktuar nga vaksina, të cilën tashmë e kanë bërë 11 milionë njerëz në Britani”.

"Ne jemi sërish të bindur se përfitimet e vaksinës AstraZeneca në parandalimin e Covid-19 me rrezikun e lidhur të shtrimit në spital dhe vdekjet e tejkalojnë rrezikun e këtyre efekteve anësore", tha shefi i EMA, Emer Cooke.

Vendet duke përfshirë Francën tani do të përballen me presion për të rifilluar vaksinimin me AstraZeneca, pasi EMA përsëriti se numri njerëzve me mpiksje të gjakut duket nuk do të jetë më i lartë se ai që shihet në popullatën e përgjithshme, megjithëse ekspertët janë vendosur për bisedime të mëtejshme para se EMA të arrijë në një përfundim te enjten.

Italia më herët pranoi se pezullimi i vaksinës AstraZeneca ishte një veprim 'politik' ndërsa mjekët francezë akuzuan Emmanuel Macron për 'shkaktimin e panikut' dhe një ligjvënës gjerman tha se ndalimi mund të shkaktojë një 'katastrofë'.

Gjermania u përpoq të justifikonte lëvizjen e saj duke thënë se një lloj i veçantë i mpiksjes së gjakut, një 'trombozë e venës sinus', kishte ndodhur shtatë herë në mesin e 1.6 milion njerëzve të vaksinuar kur pritej vetëm një rast. Vetëm katër raste të tilla janë identifikuar në Mbretërinë e Bashkuar nga 11 milionë doza të administruara.