Aeroplani me krahët më të gjerë në botë është ngritur në fluturim ditën e shtunë. Aeroplani që mban emrin Roc u nis nga Mojave, një qendër civile e testimit të mjeteve ajrore dhe atyre të hapësirës në Kaliforni.
Mjeti fluturues ka përmasat e Stacionit Ndërkombëtar të Hapësirës dhe peshon rreth 250 tonë. Ai ka 6 motorë të njëjtë me atë që përdor Boeing 747 dhe ka shtrirjen më të madhe të krahëve që ndonjë mjet fluturues ka pasur deri tani.
Ai fluturoi për 2 orë e gjysmë, duke arritur një lartësi prej 5180 m dhe një shpejtësi prej 304 km/orë. I ndërtuar nga kompania amerikane Stratolanç, ky lloj aeroplani është dizajnuar për të lëshuar raketa në orbitë. Këto të fundit qëndrojnë të fiksuara në qendër të krahut të tij të madh, i cili ka një gjatësi prej 117 metrash. Në lartësi prej 10 668, ato lëshohen, ndezin motorët e tyre dhe fluturojnë në hapësirë.
Kompania Stratolanç është themeluar nga miliarderi Pol Alen, një nga bashkëthelemuesit e Uindous, i cili vdiq në tetor 2018.
Menaxheri i përgjithshëm i kompanisë, Jean Floyd, e quajti testin një fluturim të jashtëzakonshëm.
“Ishte një fluturim i parë fantastik. Ai nxit misionin tonë për të ofruar një alternativë fleksibël për sistemet e nisura nga toka. Ne jemi jashtëzakonisht krenar për ekipin e Stratolanç, ekuipazhin e fluturimit të sotëm, partnerët tanë dhe portin aereo-hapësinor të Mojaves", tha ai.
Ndërsa Stratolanç e quan avionin e saj më të gjerin në botë, aeroplanë të tjerë e kalojnë atë për nga gjatësia nga hunda te bishti. I tillë është Antonov AN 225, me 6 motorë dhe një gjatësi prej 83.9 metra dhe Boeing 747-8, i cili është pak më i gjatë se 76 metra.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
