Presidenti i Bolivisë Luis Arce është përballur me një tentativë për të përmbysur qeverinë e tij të majtë pas një pasdite dramatike në të cilën trupa të armatosura rëndë, të komanduara nga një gjeneral i lartë i ushtrisë, sulmuan pallatin qeveritar përpara se të tërhiqeshin dhe të shihnin liderin e tyre të arrestuar.
Të mërkurën pasdite, Arce u kërkoi qytetarëve të dalin në rrugë për të mbrojtur demokracinë e vendit nga një përpjekje e dukshme për grusht shteti, pasi trupat morën kontrollin e një sheshi qendror në La Paz, ku ndodhen ndërtesat qeveritare.
“Ne kemi nevojë që populli bolivian të mobilizohet dhe të organizohet kundër këtij grushti shteti dhe në favor të demokracisë,” tha Arce në një video-mesazh të filmuar në Shtëpinë e Madhe të Popullit, rezidenca zyrtare presidenciale në kryeqytetin de facto të Bolivisë, La Paz.
I rrethuar nga anëtarët e kabinetit të tij, Arce deklaroi: “Ne nuk mund të lejojmë, edhe një herë, tentativat për grusht shteti për të marrë jetë boliviane”.
“Rroftë populli i Bolivisë! Rroftë demokracia! Rroftë presidenti ynë, Luis Arce!” bërtitën ministrat, duke futur në ajër grushtat e majtë.
Në një video-mesazh, ministrja e Jashtme, Celinda Sosa Lunda, pretendoi se disa njësi të ushtrisë kishin nisur një sulm ndaj “demokracisë, paqes dhe sigurisë kombëtare”.
Ish-presidenti Evo Morales dha alarmin pasi pamjet e trazirave u përhapën në rrjetet sociale. Morales u kërkoi mbështetësve të dalin në rrugë dhe të bllokojnë rrugët për të kundërshtuar tentativën për grusht shteti, për të cilën ai fajësoi komandantin e ushtrisë të shkarkuar së fundmi, gjeneralin Juan Jose Zuniga, i cili thuhet se u hoq nga posti i tij në prag të trazirave të së mërkurës.
“Ne nuk do të lejojmë që forcat e armatosura të shkelin demokracinë dhe të frikësojnë njerëzit,” shkroi Morales, i cili ishte presidenti i parë i Bolivisë me origjinë indigjene, por që duhej të largohej nga vendi në vitin 2019 pas asaj që mbështetësit e quajnë një grusht shteti të mbështetur nga SHBA. Morales u kthye nga mërgimi pas zgjedhjes së Arce vitin e ardhshëm.
Presidenti u përball me Zunigën teksa hynte në pallat dhe u filmua duke udhëzuar gjeneralin të ndalonte trupat e tij: “Unë jam komandanti juaj. Bindjuni urdhrave të mia.”
Në orët e vona të pasdites, Arce kishte emëruar një komandë të re të lartë ushtarake dhe trupat dhe automjetet e blinduara po tërhiqeshin nga Plaza Murillo në qendrën historike të La Paz-it, ku kishte ndodhur rebelimi në dukje i dështuar.
Shefi i ri i ushtrisë, Jose Wilson Sanchez Velaasquez, u shfaq në televizionin shtetëror së bashku me Arce dhe urdhëroi trupat që kishin dalë në rrugë të ktheheshin në kazerma.
Ndërsa ai fliste, mbështetësit e presidentit brohorisnin: “Demokraci! Demokraci! Demokraci!”
Në mbrëmje u raportua se Zuniga ishte arrestuar nën dyshimin për krimet e terrorizmit dhe kryengritjes së armatosur në hyrje të shtabit të përgjithshëm në La Paz.
Zuniga deklaroi së fundmi se Morales nuk duhet të jetë në gjendje të rikthehet si president dhe e kërcënoi se do ta bllokonte nëse do të përpiqej ta bënte këtë, gjë që bëri që Arce të largonte Zunigën nga posti i tij.
Përpara sulmit në pallatin presidencial, Zuniga iu drejtua gazetarëve në shesh dhe përmendi zemërimin në rritje në vendin pa dalje në det, i cili po lufton me një rënie ekonomike me rezervat e varfëruara të bankës qendrore dhe presionin mbi monedhën boliviano ndërsa eksportet e gazit janë tharë.
“Ndaloni së shkatërruari, ndaloni së varfëruari vendin tonë, ndaloni poshtërimin e ushtrisë sonë,” tha ai me uniformë, i rrethuar nga ushtarë, duke këmbëngulur se aksioni që po ndërmerrej ishte i mbështetur nga publiku.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
