Presidenti i Parlamentit Europian, David Sassoli, duke folur pas takimit me krerët e BE-së ka apeluar që Bashkimi Europian të mbajë fjalën ndaj Shqipërisë dhe Maqedonisë së Veriut për negociatat.
Sassoli u shpreh sot se PE mbështet hapjen e menjëhershme të negociatave me Maqedoninë e Veriut dhe Shqipërinë.
Në fjalën e tij në Këshillin Europian, Sassoli deklaroi se, “ne mbështesim hapjen e menjëhershme të negociatave me Maqedoninë e Veriut dhe Shqipërinë. Komisioni Europian është në favor të kësaj dhe ne do ta kemi të vështirë t’u shpjegojmë njerëzve të atyre vendeve pse po e vonojmë këtë gjë. Shqipërisë dhe Maqedonisë së Veriut iu kërkua të bënin sakrifica me reformat. Nëse detyrat u kryen, atëherë edhe BE duhet të mbajë premtimin. Kur ne u bëjmë thirrje vendeve fqinje të bëjnë një përpjekje shtesë për të ndryshuar dhe ata e bëjnë këtë, atëherë është detyra jonë t’u përgjigjemi me të njëjtën gatishmëri’’, deklaroi Sassoli.
Zgjerimi i Bashkimit Europian dhe hapja e negociatave me Shqipërinë dhe Maqedoninë e Veriut, është në qendër të axhendës dyditore të Samitit të krerëve të BE-së, që zhvillohet më 17-18 tetor në Bruksel, ku do të vuloset edhe fati i Shqipërisë dhe Maqedonisë, nëse do të hapen apo jo negociatat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
