Hyrja e disa trupave të xhandarmërisë serbe në në fshatin Karaçevë të Kamenicës ka sjellë shumë reagime në Kosovë. Përfaqësuesi i Bashkësisë Lokale të fshatit Karaçevë, Selver Lenjani, i ka thënë gazetës “Zëri” se askush nga qeveria qendrore dhe as lokale nuk ka dalë në terren as të pyesë banorët.
Lenjani thotë se u kanë dërguar disa kërkesa institucioneve të vendit, ku i kanë njoftuar për hyrjen e shpeshtë të forcat serbe në këtë territor.
Edhe PDK e ka dënuar ashpër prezencën e ushtrisë serbe në territorin e Kosovës. Partia Demkratike e Kosovës thotë se ky veprim i toleruar nga qeveria e Kosovës dhe KFOR-i është cenim i rëndë i sovrantitetit dhe sigurisë kombëtare.
“Është kërcënim i hapur ndaj tërësisë territoriale dhe sigurisë së qytetarëve të Kosovës. Provokimet e vazhdueshme të forcave ushtarake serbe në fshatrat e brezit kufitar dhe brenda territorit të Kosovës në sytë KFOR-it që e ka atë përgjegjësi, janë të papranueshme”, thuhet në reagim.
Ekspertët e sigurisë thonë se për këtë duhet të japë shpjegime KFOR-i. Eksperti i njohur, Ramadan Qehaja, thotë për mediat e Kosovës se kryeministri Avdullah Hoti duhet të kërkojë shpjegime nga komandanti i KFOR-it për këtë gjë, dhe se institucionet e Kosovës të mendojnë për prezencë të shtuar dhe vendosje statike të policisë kufitare në këtë dhe zona tjera.
“Komanda e KFOR-it duhet të jep shpjegim zyrtar për këtë dhe Kryeministri duhet të kërkojë shpjegime për këtë nga Komandanti i KFOR-it. Institucionet e Kosovës duhet të mendojnë për prezencë të shtuar dhe vendosje statike të policisë kufitare në këtë dhe zona e tjera”, ka thënë ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
