Policia ka dhënë detaje e para për ngjarjen e ndodhur mbrëmjen e kësaj të hëne në Elbasan, ku tre persona mbetën të plagosur si pasojë e të shtënave me armë zjarri.
Sipas njoftimit zyrtar, rreth orës 20:30, një person ende i paidentifikuar ka qëlluar me pistoletë në verandën e një lokali në drejtim të shtetasve A. T., 32 vjeç, R. M., 31 vjeç dhe B. H., 19 vjeç. Të tre të plagosurit ndodhen jashtë rrezikut për jetën.
Në momentin e ngjarjes, brenda lokalit ndodhej një oficer policie jashtë shërbimit, i cili, sapo dëgjoi të shtënat, doli menjëherë dhe u vu në ndjekje të autorit. Gjatë largimit, autori hodhi armën e zjarrit dhe arriti të arratisej në thellësi të lagjes.
Forca të shumta policie kanë rrethuar zonën dhe po zhvillojnë kontrolle intensive për lokalizimin dhe kapjen e autorit. Ndërkohë, grupi hetimor, nën drejtimin e Prokurorisë, vijon veprimet për zbardhjen e plotë të rrethanave të ngjarjes dhe administrimin e provave që do t'i shërbejnë identifikimit dhe arrestimit të autorit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
