Situata në Kakavijë, Meta: Përgjegjësia është vetëm e qeverisë shqiptare, Reagon Rama

Presidenti Ilir Meta të hënën ka bërë përgjegjës qeverinë shqiptare për situatën e rëndë që kaluan qytetarët në pikën kufitare të Kakavijës.

Gjatë një konference për mediat, Meta theksoi se qeveria gjen justifikime dhe e drejton gishtin nga ana tjetër e kufirit. 

“Situata në Kakavijë ka të bëjë me përgjegjësinë e pa ushtruar nga ana qeverisë shqiptare ndaj shtetasve të saj. Është përgjegjësia e saj parësore të marrë të gjitha masta dhe të kujdeset për shtetasit e saj. Çfarë informacioni u është dhënë njerëzve për ata që udhëtojnë jashtë vendit? A ka patur njoftim nga ana e Ministrisë për Evropën dhe Punët e Jashtme mbi kuotën e leje-kalimit mbi 750 persona në ditë? Përgjegjësia është vetëm mbi qeverinë shqiptare dhe shtetin. Radhët e gjata kilometrike janë të pajustifikuara nga autoritetet tona. Një qeveri e përgjegjshme nuk reagon pas krijimit të situatave te jashtëzakonshme, por ajo i parandalon situata të tilla. Askush nuk i informoi qytetarët dhe për më tepër qeveria i fajësoi edhe vetë qytetarët dhe kjo është e pafalshme dhe e papranueshme”, tha Meta.

Meta u shpreh gjithashtu se edhe ai vetë ndërmori veprime për të ndihmuar në zgjidhjen e krizës humanitare në pikën doganore.

“Nga ana e Presidentit janë bërë të gjitha veprimet e duhura, jo vetëm publikisht që kanë qenë shumë të rezervuara për të mos ndikuar në një debat të panevojshëm, duke qenë se ishte një çështje shumë e madhe humanitare. Ky nuk ishte rasti i parë, ishte dhe në Kapshticë, në të gjitha rastet Presidenti ka bërë përpjekjet e tij më të mira që të parandalojë çështje të tilla”, u shpreh Presidenti.

Në mbyllje të fjalës së tij, kreu i shtetit kërkoi ndjesë në emër të shtetit shqiptar për të gjithë qytetarët që për ditë të tëra kaluan momente tepër të vështira në pikat e kalimit kufitar me Greqinë.

Për 5 ditë me radhë, në pikën doganore të Kakavijës u krijua një radhë 10 kilometra me emigrantë shqiptarë që kërkonin të ktheheshin në Greqi.

Situata u qetësua në orët e para të mëngjesit të sotëm kur kaluan edhe qytetarët e fundit që kishin mbetur në radhë.

Pas konferencës së presidentit Meta, ka ardhur reagimi i kryeministrit Edi Rama.

“Fajësimi qeverisë për situatën në Kakavi, thjesht një sebep i rradhës për avazin e vjetër të një Presidenti që abuzon me institucionin e lartë,për qëllimet e ulëta të Lëvizjes së tij të Çintegruar politike! Ndërsa argumentat për fajësimin pastaj pfff..parodi tipike alla Baba Xhike”, shkruan Rama në Twitter.