Një 33-vjeçar me precedent penal në fushën e narkotikëve është arrestuar nga Policia në kuadër të operacionit të koduar “Historiku”, pas zbulimit të armëve, farave dhe lëndës narkotike në banesën e tij.
Si rezultat i administrimit të shpejtë të informacioneve të siguruara në rrugë operative, shërbimet e Komisariatit të Policisë Përmet, në bashkëpunim me Stacionin e Policisë Këlcyrë, finalizuan operacionin, duke vënë në pranga shtetasin K. K., 33 vjeç, banues në Përmet.
Gjatë kontrollit në banesën e tij, policia gjeti dhe sekuestroi 3 armë zjarri (1 kallashnikov dhe 2 pushkë), 300 fara cannabisi, një sasi cannabisi të dyshuar të poseduar me qëllim shitjen, si dhe 4 krehra me fishekë luftarakë.
Sipas Policisë, armët e sekuestruara do të dërgohen në Institutin e Policisë Shkencore për ekspertizë, me qëllim verifikimin nëse janë përdorur në ngjarje të tjera kriminale.
Materialet procedurale i janë referuar Prokurorisë së Gjirokastrës për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
