Lideri i Koresë së Veriut Kim Jong Un ka urdhëruar një shtim të prodhimit të vendit të materialeve bërthamore për të përshpejtuar prodhimin e armëve të fuqishme bërthamore, raportuan mediat shtetërore të martën.
Kim dha udhëzimet të hënën teksa inspektoi punën që po bëhej për montimin e kokave bërthamore në raketat balistike, sipas Agjencisë Qendrore Koreane të Lajmeve, e cila publikoi fotografi të objekteve që besohet të jenë koka të llojeve të ndryshme.
Urdhri i liderit erdhi ndërsa Shtetet e Bashkuara të Amerikës dhe Koreja e Jugut kryejnë stërvitje të përbashkëta ushtarake. Të martën, aeroplanmbajtësja amerikane me energji bërthamore Nimitz mbërriti në një port në qytetin jugor të Koresë së Jugut, Busan. Koreja e Veriut ka denoncuar ushtrime të tilla si një provë për pushtim.
Pheniani ka lëshuar një seri raketash balistike kohët e fundit, teksa rritet frika se vendi mund të përgatitet për të kryer testin e shtatë bërthamor.
Kim Jong Un u informua mbi detajet e programit bërthamor si mjetet për aplikimin e armëve bërthamore dhe specifikimet teknologjike dhe shqyrtoi planin e vendit dhe urdhrat me shkrim për operacionet e kundërsulmit bërthamor, tha KCNA.
Rodong Sinmun, gazeta zyrtare e Partisë së Punëtorëve të Koresë, kritikoi të martën stërvitjen e përbashkët SHBA-Korenë e Jugut dhe këmbënguli se është “e natyrshme që forca jonë bërthamore të shkojë në një mision të rëndësishëm kur autonomia dhe siguria e vendit të kërcënohet”.
KCNA raportoi gjithashtu se një njësi e udhëhequr nga Byroja e Përgjithshme e Raketave të forcave të armatosura të Koresë së Veriut testoi të hënën dy raketa taktike balistike tokë-tokë të ngarkuara me koka bërthamore të rreme, ku të dyja shpërthyen 500 metra mbi objektivin e synuar.
Japonia dhe Koreja e Jugut zbuluan lëshimin e dy raketave balistike të hënën në brigjet lindore të Veriut, ku raketat besohet se kanë rënë në det jashtë zonës ekskluzive ekonomike të Tokios.
Ushtria e Koresë së Jugut deklaroi të hënën se beson se pretendimet e Veriut se ka zhvilluar sistemin e ri të sulmit bërthamor nënujor pa pilot janë “të ekzagjeruara”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
