“Menduam se ishin luftëtarë të Hamasit”, Izraeli pranon vrasjen e ekipit të mjekëve në Gaza

<p>Forcat e Mbrojtjes së Izraelit (IDF) kanë pranuar se rrëfimi i tyre për vrasjen e një ekipi mjekësor prej 15 personash dhe punonjësve të shpëtimit në Gaza ishte i pasaktë, raportuan disa media të shtunën, duke cituar gjetjet paraprake të një hetimi për incidentin.</p> <p>Më 23 mars, një grup ushtarësh afër Rafahut qëlluan mbi një kolonë ambulancash të Shoqatës së Gjysmëhënës së Kuqe Palestineze, një makinë të OKB-së dhe një kamion zjarrfikës nga Mbrojtja Civile e Gazës.</p> <p>IDF-ja pretendoi në atë kohë se kolona po udhëtonte në errësirë ​​me dritat e fikura.</p> <p>Të shtunën, New&nbsp;York Times publikoi një video të bërë me celular që provonte se ambulancat kishin shenja të qarta se kujt i përkisnin dhe i kishin fenerët e tyre të ndezur. Po ashtu, në video bie në sy se ekipi mjekësor mbanin të gjithë veshje reflektuese kur u qëlluan në lagjen Tel Sultan të Rafah.</p> <p>Sipas NYT, një zyrtar i IDF tha në një konferencë për gazetarët më vonë atë ditë se ushtarët kishin identifikuar "<em><strong>gabimisht</strong></em>" shpëtuesit si luftëtarë të Hamasit. Zyrtari shtoi se incidenti “<strong><em>do të ekzaminohet tërësisht dhe në thellësi</em></strong>”.</p> <p>The Times of Israel citoi gjetjet paraprake duke thënë se IDF kishte ngritur një pritë në rrugë rreth orës 4 të mëngjesit me kohën lokale. Rreth gjysmë ore më vonë, një makinë e policisë së Hamasit kaloi pranë dhe shkëmbyen zjarr me ushtarët, të cilët vranë një militant dhe kapën dy të tjerë.</p> <p>Rreth orës 6 të mëngjesit, trupat izraelite panë autokolonën e ambulancës dhe hapën zjarr. Një operator i dronëve të vëzhgimit u kishte thënë më herët se kolona po lëvizte në një "<strong><em>mënyrë të dyshimtë</em></strong>", tha IDF.</p> <p>IDF tha gjithashtu se të paktën gjashtë nga punonjësit e vrarë u identifikuan pas vdekjes nga zyrtarët e inteligjencës si operativë të Hamasit.</p> <p>Muajin e kaluar, Izraeli rifilloi sulmet ajrore dhe operacionet tokësore kundër Hamasit në Gaza pasi palët nuk arritën të bien dakord për zbatimin e fazës së dytë të armëpushimit të ndërmjetësuar nga SHBA, Egjipti dhe Katari në janar.</p> <p>&nbsp;</p>