Ish-kryeministri italian, Silvio Berlusconi, vuante prej disa kohësh nga kanceri kronik i gjakut dhe aktualisht është në kujdes intensiv për një infeksion të mushkërive, thanë mjekët e tij të enjten.
86-vjeçari, perandoria mediatike e të cilit e ka bërë atë miliarder, u dërgua me urgjencë në njësinë e kujdesit intensiv të spitalit San Raffaele të Milanos të mërkurën, duke shtuar shqetësimet për shëndetin e tij gjithnjë e më të brishtë.
Në deklaratën e tyre të parë për gjendjen e tij, mjekët Alberto Zangrillo dhe Fabio Ciceri zbuluan se Berlusconi ishte diagnostikuar në të kaluarën me Leuçemi Mielomonocitare Kronike. Ata nuk specifikuan se kur u zbulua për herë të parë kanceri, duke thënë vetëm se nuk ishte akut.
“Silvio Berlusconi aktualisht është në kujdes intensiv për trajtimin e një infeksioni të mushkërive”, thanë ata, duke shtuar se sëmundja lidhej me kancerin.
Partia Forza Italia e Berlusconit është pjesë e koalicionit të krahut të djathtë të kryeministres Giorgia Meloni, megjithëse ish-kryeministri nuk ka një rol në qeveri.
Berlusconi dha dorëheqjen si kryeministër për herë të fundit në vitin 2011, pas ngërçeve politike dhe skandaleve, përfshirë festat e tij famëkeqe "bunga-bunga", ndërsa Italia iu afrua një krize borxhi të stilit grek.
Por ai u kthye në Senat pas zgjedhjeve kombëtare shtatorin e kaluar dhe deri tani nuk ka asnjë pasardhës të dukshëm si lider i partisë së tij.
Përveç ndikimit të tij të qëndrueshëm në politikën italiane, grupi mbajtës i familjes Fininvest i Berlusconit ruan kontrollin e biznesit të transmetimit MediaForEurope. Djali i tij Pier Silvio Berlusconi është shefi ekzekutiv i kompanisë.
Berlusconi ndërtoi rrjetin më të madh televiziv komercial të Italisë dhe fitoi një profil ndërkombëtar si pronar i kampionëve evropianë të futbollit AC Milan përpara se të hynte në politikë në vitin 1994, kur klasa e mëparshme politike u rrëzua nga një skandal korrupsioni.
Shëndeti i tij është përkeqësuar vitet e fundit. Ai bëri një operacion në zemër në vitin 2016, ka pasur edhe kancer të prostatës dhe është shtruar vazhdimisht në spital që nga infektimi për herë të parë me Covid-19 në vitin 2020.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
