Mosrespektimi i të drejtës së informimit nga ana e institucioneve shtetërore ndodh në jo pak raste në Shqipëri. Edhe pse ligji i detyron institucionet të vënë në dispozicion të kujtdo informacione për veprimtarinë e tyre dhe personave që ushtrojnë funksione shtetërore, kjo në disa raste shmanget. Rasti më i fundit është ai i një kompanie private, e cila ka kërkuar informacion në Ministrinë e Shëndetësisë lidhur me listën e barnave me çmimet CIF për vitet 2014-2019.
Pas indiferencës së institucionit, Life sh.p.k. i është drejtuar me një ankesë Komisionerit për të Drejtën e Informimit, i cili pasi ka kryer inspektimin, ka zbuluar se, kërkesa ishte deleguar në Sektorin e Rregullimit të Tregut Farmaceutik. Ky i fundit, pasi ka përgatitur përgjigjen, ia ka përcjellë sekretarit të Përgjithshëm të Ministrisë së Shëndetësisë.
Por ky i fundit nuk e ka nisur përgjigjen te pala kërkuese. Në seancën dëgjimore të palëve, të organizuar nga Komisioneri për të Drejtën e Informimit, ministria e ka motivuar mungesën e transparencës, duke u shprehur se lista e çmimeve CIF të barnave për vitin 2020 ishte në proces përgatitjeje dhe dhënia e informacionit mund të cenonte procesin.
Por ky qëndrim është cilësuar nga Komisioneri i pabazuar në ligj dhe për këtë arsye, Ministrisë i është dhënë afat deri në përfundim të ditës së punës që të bënte transparencë për informacionin e kërkuar.
Në përfundim, Komisioneri ka vendosur dënimin me gjobë të Sekretarit të Përgjithshëm në masën 150 000 lekë, shumë e cila do t’i mbahet nga paga në formën e kësteve mujore.
Çmimet CIF përfshijnë barnat e regjistruara dhe të rimbursueshme në Shqipëri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
