Ish-kryeministrja britanike Theresa May njoftoi të premten se do të japë dorëheqjen si ligjvënëse kur të caktohen zgjedhjet këtë vit, duke i dhënë fund një karriere parlamentare 27-vjeçare ku përfshihen tre vjet si lidere e vendit, gjatë një periudhe të trazuar nga Brexit.
May i tha gazetës lokale, Maidenhead Advertiser, se puna e saj në luftën kundër trafikimit të qenieve njerëzore dhe skllavërisë moderne po i merrte më shumë kohë dhe se “Kam kuptuar se, duke parë përpara, nuk do të mund të bëja më punën time si deputete në mënyrën që unë besoj se është e drejtë dhe e meritojnë zgjedhësit e mi.”
May, 67 vjeç, ka qenë deputete e parlamentit për Maidenhead, në perëndim të Londrës, që nga viti 1997.
Ajo shërbeu në disa poste qeveritare, përfshirë sekretaren e brendshme midis viteve 2010 dhe 2016, përpara se të zgjidhej si udhëheqëse dhe kryeministre konservatore në pasojat kaotike të Britanisë në qershor 2016 kur u votua për t’u larguar nga Bashkimi Evropian.
May ishte kryeministrja e dytë femër e Britanisë, pas koleges konservatore Margaret Thatcher.
Pothuajse 100 nga 650 ligjvënësit në Dhomën e Komunave kanë njoftuar se nuk do të kandidojnë për rizgjedhje, mes tyre 64 konservatorë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
