Mitsotakis: Do ashpërsojmë dënimet për zjarrvënësit

Kryeministri grek paralajmëron ashpërsimin e dënimeve për zjarrvënësit.

“Gjobat do të rriten dhe zjarrvënësit e dënuar do të duhet të kryejnë dënimin në burg edhe në rastet e neglizhencës”, tha të enjten kryeministri Kyriakos Mitsotakis, gjatë një debati parlamentar mbi trajtimin e zjarreve masive që kanë shkatërruar një pjesë të tokës pyjore në Greqi, dy muajt e fundit.

“Kemi pasur një verë të vështirë, e cila ende nuk ka mbaruar pasi zjarri në Evros vijon ende. Qëllimi ynë i parë është të kërkojmë përgjigje dhe të konvergojmë në zgjidhje. Kriza klimatike është këtu, duke na kërcënuar gjithnjë e më shumë të gjithëve”, u tha Mitsotakis ligjvënësve.

Zjarri i vazhdueshëm në Evros, zjarri më i madh në Bashkimin Evropian që kur blloku filloi të mbante të dhëna, ishte veçanërisht i vështirë dhe "do të studiohet për shumë vite nga shkencëtarët", tha ai.

Mitsotakis tha se shkaku i zjarrit të vazhdueshëm në Evros po hetohet. “Është pothuajse e sigurt se shkaku është i krijuar nga njeriu. Dhe është pothuajse e sigurt që është ndezur në rrugët e përdorura nga emigrantët e paligjshëm,” tha ai, duke dhënë detaje të mëtejshme.

Mitsotakis këmbënguli se qeveria ka financuar masat parandaluese edhe pse jo të gjitha bashkitë ishin të përgatitura njësoj. “Jo të gjitha zjarret kanë të njëjtën rëndësi ekologjike. Jo të gjitha zjarret kanë të njëjtin ndikim në mjedis. Hektarët e djegur nuk kanë vlerë të barabartë,” vazhdoi ai.