Burrel/ Edi Rama: Ilir Meta e ka humbur të drejtën për të qenë president

Edi Rama gjatë prezantimit të kandidatit për kryetar bashkie në Burrel, theksoi  sërish se zgjedhjet do të mbahen më 30 qershor dhe u shpreh se Ilir Meta e ka humbur të drejtën për të qenë president.

 "Dje papritur u shfaq shpëtimtar i atyre që kishin mbatur atje në rrugë, presidenti i Republikës duke paralajmëruar një akt që politikisht është vetëvrasje, ligjërisht është nul dhe moralisht është turp. Dhe s'ka më turp, dhe mos u çudisni nëse ju them se nga fronti shpëtimtar i opozitës nuk është çmenduria e fundit, do ketë edhe gjëra të tjera. Do apo s'do Saliu, do apo s'do filxhani, zgjedhjet do mbahen në 30 qershor. Kushtetuta nuk është filxhan që e rrotullon nga të duash. Dje Ilir Meta  e ka shkruar fatin e tij si një president që e ka humbur të drejtën të qëndrojë në këtë zyrë dhe jo sepse kështu them unë, por sepse kjo që shikoni është dhe do jetë pasqyra e një të vërtete do t'iu bëhet shumë e qartë. Kjo luftë nuk është për Bashkitë. Gjithë kjo orvatje për ta çuar Shqipërinë në orvatje nuk bëhet për disa bashki, por sepse kërkohet një pazar për të varrosur reformën në drejtësi, kërkohet rrëmujë për të goditur të vetmen forcë që do të jetë mbështetësja e reformës në drejtësi dhe e zbatimit të saj për të kaluar nga ligjet te gjyqet", tha Rama.