“Qilimi shqiptar” në Shirokë, nominohet për çmimin prestigjioz në Evropë

“Qilimi shqiptar”, në sheshin e ri në Shirokë frymëzuar nga identiteti kulturor i zonës nominohet për çmimin prestigjioz të arkitekturës bashkëkohore “Mies Van Der Rohe Award”.

Lajmin është bërë i ditur nga kandidati për deputet i PS për qarkun Shkodër, Ilir Beqaj i cili e ka cilësuar një lajm fantastik dhe një promovim të jashtëzakonshëm për Shkodrën.

“Lajm fantastik! Projekti i rikualifikimit urban të Shirokës “Qilimi shqiptar” është nominuar për çmimin “Mies Van Der Rohe Award” që është një çmimet më prestigjiozë të arkitekturës botërore. Publicitet i jashtëzakonshëm për Shirokën, Shkodrën, por edhe për gjithë Shqipërinë”, shprehet Beqaj.

Projekti i rikualifikimit urban të Shirokës përfshiu restaurimin e 2000 m2 fasada, ndërtimin e 1500 m2 çati të reja, si dhe ndërtimin e një hapësire, prej 1700 m2 parking publik. Hapësira e rikonstruktuar e sheshit është 20.000 m2 në total.

Çmimi i Bashkimit Evropian për Arkitekturën Bashkëkohore – “Çmimi Mies van der Rohe”, jepet çdo dy vjet për të vlerësuar dhe shpërblyer prodhimin cilësor të arkitekturës në Evropë. Në këtë mënyrë, Çmimi tërheq vëmendjen për kontributin kryesor të profesionistëve evropianë në zhvillimin e ideve dhe teknologjive të reja.