Shqipëria do të forcojë bashkëpunimin ushtarak me Bullgarinë dhe Maqedonisë. Kjo ka qenë tema e takimit të zhvilluar të premten, 1 dhjetor 2017, në Ohër, mes zv.ministrit të Mbrojtjes të Shqipërisë, Petro Koçi, ministrit bullgar të Mbrojtjes, Krasimir Karakachanov dhe asaj homologes maqedonase, Radmila Sekerinska.
Zv.ministri shqiptar i Mbrojtjes, Petro Koçi është shprehur pas takimit se Bullgaria dhe Shqipëria do të jenë avokatë të fortë për anëtarësimin e Maqedonisë në NATO sa më shpejt që të jetë e mundur, pasi sipas tij, statusi i anëtarit për këtë vend, është domethënës për të gjithë rajonin e Ballkanit.
Ministri bullgar Karakachanov ka deklaruar nga ana e vet, se bashkëpunimi mes të tri vendeve duhet të shkojë përtej interesit të Korridorit 8 dhe duhet të zgjerohet edhe në sferën e mbrojtjes.
“Bashkëpunimi në fushën e mbrojtjes dhe të sigurisë mes Bullgarisë dhe Shqipërisë, që janë pjesë e NATO-s, do të bindin anëtarët e tjerë të NATO-s se Maqedonia është gati për anëtarësimin dhe se ky vend duhet të pranohet pa vonesë. Ky bashkëpunim trilateral është i një interesi ekonomik, që do të kontribuojë po ashtu për përmirësimin e sigurisë në Ballkan”, është shprehur ministri bullgar.
Zhvillimi në fjalë vjen në kontekstin e një përmirësimi të përgjithshëm marrëdhëniesh mes Maqedonisë dhe Bullgarisë që kanë nënshkruar së fundmi Traktatin e Miqësisë dhe pas miratimit në Shqipëri të ligjit për pakicat që mori në konsideratë edhe një kërkesë të Sofjes zyrtare për njohjen e pakicës bullgare në Shqipëri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
