Reja: Dua të vazhdoj në drejtimin e Shqipërisë, nuk do të marr lojtarë që nuk ndjejnë fanellën

Trajneri i Kombëtares Edoardo Reja, ka folur në konferencë për shtyp, një ditë para ndeshjes miqësore me Armeninë. I pyetur për të ardhmen, Reja deklaroi se dëshira e tij është të vazhdojë të drejtojë Shqipërinë.

Gjithashtu Reja u shpreh se Shqipërisë i mungon një sulmues si Immobile i Italisë, i cili shënon në rastet që i jepen.

Sa i përket të ardhmes time, ne kemi folur shpesh. Por, nëse duhet të flasim për rritjen. E vërteta është se Shqipëria ka pasur rritje muaji pas muaji. Sa i përket kontratës, është diçka që gjykon tjetër kush. Për skuadrën kemi bërë mirë në kaq kohë sa kemi punuar bashkë. Rezultatet nuk kanë qenë fort të mira, realisht. Mund të përmendim ndeshjen me Izraelin. Duhet të kishim marrë më shumë pikë. Ne jemi penalizuar me episode të ndryshme të këtyre ndeshjeve. Mos të ishte për minutat shtesë, mund të kishim më shumë pikë. Më vjen shumë keq për këtë sepse kemi humbur pikë, më vjen keq për pikët. Në aspektin personal, unë dua të vazhdoj, por nuk jam unë ai që vendos për këtë marrëdhënie. Kampionati shqiptar ka elementë që janë vërtetë të vlefshëm dhe po mundohemi t’i ingranojmë.

Nëse lojtarët e ndjenjë fanellën, tejkalohen aftësitë teknike. E kemi thënë gjithmonë që duhet të përmirësohemi në këtë aspekt, ndoshta është çështje mentaliteti. Mendoj se jemi përmirësuar. E pamë dhe me Italinë. Prap na ndodhi. Më duket pak e çuditshme. I dimë mirë pikat e dobëta. Episodet bënë diferencën. Me Italinë kemi krijuar aq shumë raste për gol, por nuk shënuam. Edhe në aspektin mbrojtës treguam dobësi. Po flisnim pak me Hysajn për Imobilen, është lojtar që futet në zonë dhe shënon. Nëse do të kishim një lojtar të tillë, do të ishte shumë e lehtë për ne. Është bërë një punë e mirë. Do të ishte e rëndësishme paraqitja e lojtarëve ndaj Italisë. Kemi bërë një lojë të mirë dhe jemi kompetitiv. Treguam që jemi një grup i mirë.

Nëse vazhdon në drejtimin e Shqipërisë, Reja tha se do të marrë në skuadër vetëm lojtarë që ndjejnë fanellën, ndërsa shtoi se kush vjen pa dëshirë, do largohet nga Kombëtarja.

Normalisht në të ardhmen duhet të bëj disa zgjedhje definitive. Është dhe çështje brezi. Disa lojtarë duhet të largohen gradualisht. Kemi 40 lojtarë që i vëzhgojmë prej 2 viteve. Synimi ynë është arritja e EURO 2024. Po shohim lojtarë të rinj, është proces i vështirë për të krijuar grupin e duhur. Koha në dispozicion është e pakët, pra në mars. Duhet punuar duke vlerësuar gjithë lojtarët e rinj. Futbollistët që duhet të vijnë, të vijnë me bindjen për të ndjerë fanellën. Unë do të jem i vendosur për të bërë zgjedhje definitive në këtë drejtim.

Fiks bëhen 1 vit e 3 ditë nga fitorja e fundit me Shqipërinë. Më vjen keq se nuk jam mësuar me rezultate të tilla. Armenia është e rëndësishme. Dua të provoj sa më shumë lojtarë të rinj. Nuk dua të krijoj pritshmëri sa i përket rezultateve. Janë 3-4 lojtarë nga kampionati shqiptar dhe pres të bëjnë mirë në këtë takim. Është një ndeshje që vlejnë pikët dhe paraqet një rëndësi të madhe për ne.

Sigurisht që unë e kisha programuar dhe më parë që do të provoj lojtarë të rinj. Disa lojtarë me Italinë s’ishin mirë në aspektin fizik. Deri nesër në mëngjes do të bëj vlerësimet e mia. Për shembull Kumbulla që do të shihet nëse do të luajë. Sa i përket të rinjve, Hadroji dhe Gurishta mund ta nisë nga fillimi. Muçi dhe Skuka do të luajnë për herë të parë nga minuta e parë. Jam i bindur që do të bëjnë një paraqitje të mirë. Emocionet bëjnë të veten. Janë futbollistë që kanë treguar se janë shumë të mirë.  Në kohët e sotme të gjithë të rinjtë janë të bindur se janë të fortë dhe kanë të drejtë të luajnë e të jenë titullarë. Por, në fakt duhet shumë durim dhe punë. Kur të vijnë në Kombëtare të jenë të bindur që ta ndjenjë peshën e fanellës. Të rinjtë e sotëm i duan gjithçka shpejt. Kjo është e gabuar. Në kombëtare s’ke kohë të bësh eksperimente. Ata që do të ftohen, ata që vijnë pa dëshirë nuk do të jenë më pjesë e Kombëtares.

Sigurisht në këtë drejtim e ndjej si të veçantë dhe emocionuese. Nëse nuk do të jem trajner i Shqipërisë, jam i dashuruar me këtë vend. Kam parë Sarandën, Gjirokastrën. Janë qytete të mrekullueshme. Këtu s’janë vetëm plazhet, por edhe natyra është shumë e bukur. Unë do të kthehem këtu, edhe për të parë edhe ndonjë ndeshje. Ka shumë njerëz që më duan dhe më respektojnë. Do të doja të vizitoja dhe Krujën. Kam lexuar edhe disa libra për të njohur pak më shumë libra. E di që shqiptari bezdiset kur i fluturon dhe një mizë afër. Karakterin e luftës me Turqinë do të doja ta tregonin dhe me Kombëtaren në fushë.