Kryeministri i Bullgarisë, Boiko Borissov, do të gjobitet pasi hyri në një kishë pa maskë. Bëri të ditur ministria bullgare e Shëndetësisë. Sipas rregullave të miratuara nga qeveria e tij, Borissov, stafi i tij dhe disa gazetarë do të paguajnë gjobë deri në 150 €.
Përdorimi i detyrueshëm i maskës në mjediset e brendshme publike u rivendos si masë të martën në Bullgari për shkak të rritjes së rasteve të koronavirusit.
"Për kryeministrin, stafin e tij dhe gazetarët do të vendoset gjobë për mosrespektimin e masave kundër epidemisë dhe në veçanti për shkeljen e dekretit për mbajtjen e detyrueshme të maskave në vende të mbyllura publike", tha Ministria e Shëndetësisë në një deklaratë.
Borissov shkoi të martën në manastirin Rila në pjesën jug-perëndimore të vendit për një projekt të rinovimit të rrugës që të çon në këtë vend të famshëm fetar. Ai foli nga afër me eprorin e manastirit përpara se të hynte në kishë pa maskë.
Drejtuesi konservator 61-vjeçar nuk ka pranuar të mbajë maskë që nga fillimi i pandemisë
Bullgaria, e cila ka vendosur masa kufizuese që në 8 mars, ka qenë një nga vendet evropiane më pak të prekura nga pandemia. Sidoqoftë, me heqjen e shpejtë të kufizimeve në fund të majit, kohët e fundit ka pasur një mesatare prej më shumë se 100 infeksionesh të reja në ditë, krahasuar me 20-40 gjatë periudhës së kufizimit.
Kjo nuk është gjoba e parë për Borisov. Ministria e Shëndetësisë gjobiti me 1 500 € të hënën partinë konservatore Gerb të Borissov për mbajtjen e një takimi të shtunën në një dhomë të mbushur me njerëz në prani të kryeministrit.
Një gjobë e ngjashme u vendos për partinë e opozitës socialiste, katër prej anëtarëve të së cilës u infektuan në një takim tjetër.
Deri të martën, Bullgaria numëronte 3 984 të infektuar me koronavirus dhe 207 raste vdekjeje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
