Kryemadhi, letër SPAK: Informacion mbi statusin juridik të Veliajt, Agaçit dhe Subashit (VIDEO)

Lëvizja Socialiste për Integrim, i drejton një kërkesë SPAK lidhur me statusin juridik të çështjes së inceneratorëve.

Më konkretisht kryetarja e LSI, Monika Kryemadhi i kërkon SPAK informacion në lidhje mbi paditë që forca politike që drejton ka dorëzuar në SPAK në lidhje me çështjen e inceneratorëve. Përtej statusit penal të Lefter Kokës dhe Alqi Bllakos të cilët tashmë janë të arrestuar, Kryemadhi kërkon informacion mbi statusin juridik të kryetarit të Bashkisë së Tiranës Erion Veliaj, Sekretarit të Përgjithshëm të Kryeministrisë Engjëll Agaçi dhe kryetarit të Bashkisë së Fierit Armando Subashi.

Në kërkesën e saj, Kryemadhi thotë se nuk synon të cenojë sekretin hetimor por si palë paditëse kërkon një informacion për persona nën hetim apo të pandehur për inceneratorin e Fierit dhe Tiranës.

Letra e plotë

DREJTUAR: Strukturës së Posaçme Kundër Korrupsionit dhe Krimit të Organizuar

(SPAK)

Adresa: Rruga Jordan Misja, Nr 1, Tiranë 1000, Shqipëri

Në vëmendje të Z. Arben Kraja.

LËNDA:  Informacion mbi statusin juridik të çështjes penale.

I nderuar Drejtues i Prokurorisë së Posaçme,

Lëvizja Socialiste për Integrim, në datat: 04.03.2021, 30.03.2021 dhe 20.10.2021, ka depozituar tre kallëzime penale, respektivisht për projektet e Inceneratorit të Tiranës, Elbasanit dhe Fierit, për veprat penale: shpërdorim detyre, shkelje të barazisë së pjesëmarrësve në tender, evazion fiskal etj, pranë Strukturës së Posaçme Kundër Korrupsionit dhe Krimit të Organizuar (SPAK), ndaj subjekteve:

1) Kryetarit të Bashkisë Tiranë, Z. ERION VELIAJ; Titullarit të Autoritetit Kontraktor, Ish Ministrit të Mjedisit, Z. LEFTER KOKA; Sekretarit të Përgjithshëm të Këshillit të Ministrave, Z. ËNGJËLL AGAÇI; Ish Sekretarit të Përgjithshëm të Ministrisë së Mjedisit Z. ALQI BLLAKO, Komisionit të Dhënies me Koncesion për projektin: “Për Ndërtim Landfilli, Inceneratori dhe Rehabilitim i Venddepozitimeve Ekzistuese Qarkut Tiranë dhe Prodhimin e Energjisë Elektrike”.

2) Titullarit të Autoritetit Kontraktor, Ish Ministrit të Mjedisit, Z. LEFTER KOKA; Sekretarit të Përgjithshëm të Këshillit të Ministrave, Z. ËNGJËLL AGAÇI; Ish Sekretarit të Përgjithshëm të Ministrisë së Mjedisit Z. ALQI BLLAKO, Komisionit të Dhënies me Koncesion për projektin “Për Ndërtimin dhe administrimin e Impiantit të Përpunimit të Mbetjeve Urbane të Qarkut Elbasan dhe prodhimin e Energjisë”;

3) Titullarit të Autoritetit Kontraktor, Ish Ministrit të Mjedisit, Z. LEFTER KOKA; Kryetarit të Bashkisë Fier, Z. ARMANDO SUBASHI, Ish Drejtorit të Përgjithshëm të AKUKIM dhe Ish- Sekretarit të Përgjithshëm të Ministrisë së Mjedisit Z. ALQI BLLAKO, Komisionit të Dhënies me Koncesion për projektin “Për Ndërtimin dhe administrimin e Impiantit të Administrimit të Mbetjeve Urbane të Qarkut Fier dhe prodhimin e Energjisë”;

Gjithashtu, në datë 16.12.2021 kemi depozituar pranë jush material me prova shtesë lidhur me evazionin fiskal të kryer nga të tre shoqëritë koncesionare, në funksion të hetimit të veprave penale të kallëzuara.

Nga njoftimet publike që janë publikuar në faqen zyrtare të SPAK por edhe nga deklarimet tuaja të ndryshme në media, jemi vënë në dijeni të faktit se:

Për Inceneratorin e Elbasanit, nga SPAK është marrë si i pandehur dhe është marrë masa e sigurisë Burg pa Afat për personin e kallzuar Z. LEFTER KOKA;

Për Inceneratorin e Fierit, nga SPAK është marrë si i pandehur dhe është marrë masa e sigurisë Burg pa Afat për personat e kallzuar Z. LEFTER KOKA dhe Z. ALQI BLLAKO;

Gjithashtu, janë marrë si të pandehur dhe me masë sigurie Burg pa Afat për Kryetarin e Komisionit të Dhënies me Koncesion Z. PËLLUMB ABESHI dhe disa anëtarë të Komioneve respektive (Elbasan dhe Fier).

Ndërkohë,

a) Nuk ka asnjë njoftim zyrtar apo informacion për personin e kallzuar Z.ËNGJËLL AGAÇI, zyrtar i cili siç e kemi sqaruar edhe në kallzimin penal ka një rol kyç në miratimin e paligjshëm të financimit me VKM të Kontratës Koncesionare të Inceneratorit të Elbasanit. Ky zyrtar edhe pse ishte njoftuar nga APP se procedura koncesionare që po ndiqte Ministria e Mjedisit ishte në kundërshtim me Ligjin e Koncesioneve, ka organizuar rendin e ditës dhe ka paraqitur për miratim në mbledhjen e Këshillit të Ministrave vendimin për miratimin e financimit të këtij projekti. Me këtë veprim aktiv, Z.AGAÇI ka shpërdoruar haptazi detyrën e Sekretarit të Përgjithshëm të KM, duke bërë të mundur që në mënyrë të paligjshme të miratohet Vendimi i Këshillit të Ministrave për financimin e kontratës koncesionare;

b) Nuk ka asnjë njoftim zyrtar apo informacion për personin e kallzuar Z.ARMANDO SUBASHI, zyrtar i cili siç e kemi sqaruar edhe në kallzimin penal ka një rol kyç në pagesën për shpronësimin e paligjshëm të tokës ku është ndërtuar inceneratori i Fierit, siç edhe ju vetë e keni konstatuar kur keni marrë masën e sigurisë ndaj personave nën hetim LEFTER KOKA, ALQI BLLAKO dhe PËLLUMB ABESHI. Referuar njoftimit tuaj në faqen zyrtare rezulton se SPAK ka vlerësuar se, citoj: nga hetimet kanë rezultuar të dhëna për veprime të kundraligjshme të Kryetarit të Komisionit të Shpronësimit, Z. Pëllumb Abeshi, në bashkëpunim me Ish Ministrin e Mjedisit Lefter Koka dhe Ish Sekretarin e Përgjithshëm të Mjedisit Alqi Bllako, lidhur me kualifikimin e llojit të pronës ku do të ndërtohej Inceneatori i Fierit – tokë arë apo tokë truall, ndërkohë që sjellim në vëmendjen tuaj se me VKM nr. nr.951, datë 28.12.2016, në pikën 4 parashikohet se: Vlera e Përgjithshme e shpronësimit në shumën prej 46 299 060 (dyzet e gjashtëmilion e dyqind e nëntëdhjetë e nëntë mijë e gjashtëdhjetë) lekë të përballohet nga Buxheti i Bashkisë Fier. Pra, Z. SUBASHI ka sjellë dëmin ekonomik konkret në buxhetin e shtetit, me pagesën e kryer ndaj subjekteve që janë shpronësuar. Në këtë kuptim jemi shumë të interesuar të njihemi me argumentat ligjorë që po shqyrton dhe ka në konsideratë SPAK lidhor me pozicion penal të Z. SUBASHI në këtë process, duke mos harruar edhe faktin se është pikërisht Z.SUBASHI personi që ka vënë në dijeni Ministrinë e Mjedisit për kualifikimin e tokës (tokë truall apo arë) ku do të ndërtohej Inceneratori i Fierit, fakt ky, i cili provon se Z. Subashi kishte dijeni për shkeljen.

c) Nuk ka asnjë njoftim zyrtar informacion lidhur me hetimet apo subjektet e kallzuara për Inceneratorin e Qarkut Tiranë. Në fakt deri më sot, në Tiranë ka vetë një pike grumbullimi të mbetjeve urbane, dhe nuk incenerohet asnjë kg mbetje. Risjellim në vëmendjen tuaj se vetëm me një firmë individuale, Z. Erion Veliaj në komunikimin me Ministrinë e Mjedisit, ka ndryshuar fatin e Inceneratorit të Qarkut të Tiranës, duke dhënë dakordësinë pa Vendim të Këshillit Bashkiak për as më shumë dhe as më pak por plot 128 milion euro.  

Në këto kushte, i nderuar Drejtues i SPAK, në cilësinë e kallzuesit dhe si subjekt që ka në mënyrë të drejtpërdrejtë interes të ligjshëm lidhur me kallëzimin e depozituar, si dhe bazuar në nenin 283 e vijues të Kodit të Procedurës Penale, me anë të kësaj kërkese kërkojmë informacion lidhur me:

 1) Statusin Juridik të të tre procedimeve penale për të cilat LSI ka depozituar kallzime penale;

2) Pa cenuar parimin e sekretit hetimor, aktet dhe provat e administruara nga Prokuroria si dhe informacion lidhur me personat që po hetohen nga Prokuroria dhe statusin penal që u atribuohet personave që po hetohen për të tre Inceneratorët;

3) Nëse ka persona që kanë status penal “nën hetim” apo “të pandehur” për Inceneratorët e Fierit apo të Tiranës, kërkojmë informacion lidhur me masat konkrete të sigurisë që janë marrë nga Prokurori i çështjes.

Risjellim në vëmendjen tuaj ndjeshmërinë dhe impaktin publik që kanë këto çështje, si dhe afatet ligjore të parashikuara në Kodin e Procedurës Penale.

Duke ju falenderuar, mbetemi në pritje të informacionit Tuaj!