Gjykata Kushtetuese ka vendosur të pezullojë përkohësisht dekretin e Presidentit të Republikës, Bajram Begaj, i cili parashikonte zhvillimin e zgjedhjeve të parakohshme në Bashkinë e Tiranës më 9 nëntor 2025.
Vendimi është marrë pas shqyrtimit të një kërkese që lidhet me ligjshmërinë e dekretit, ndërsa pezullimi mbetet në fuqi deri në shqyrtimin përfundimtar të çështjes.
Menjëherë pas publikimit të këtij vendimi, Presidenca ka reaguar zyrtarisht përmes një deklarate për mediat, ku shprehet se e respekton vendimin e Gjykatës Kushtetuese dhe se do të presë përfundimin e shqyrtimit të plotë të çështjes.
Në përgjigje të interesit të mediave, ju bëjmë me dije se Institucioni i Presidentit të Republikës respekton vendimin e Gjykatës Kushtetuese për pezullimin e pjesës që përcakton datën e zgjedhjeve vendore në Bashkinë e Tiranës, të dekretit nr. 350, datë 01.10.2025.
Për momentin, nuk është bërë e ditur një datë e re për zhvillimin e zgjedhjeve, në pritje të vendimit përfundimtar të Gjykatës Kushtetuese.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
