Drejtuesit e BE-së do të përpiqen të sigurojnë Ballkanin Perëndimor për të ardhmen e tyre europiane dhe t’u tregojnë atyre që nuk i kanë harruar gjatë krizës së koronavirusit të ri.
Ky samit virtual i Bashkimit Europian me përfaqësuesit e gjashtë vendeve ballkanike ishte parashikuar fillimisht në Zagreb, kryeqyteti i Kroacisë që mban presidencën e radhës të Bashkimit Europian.
Bashkimi Evropian do të ritheksojë përkushtimin për perspektivën evropiane të vendeve të rajonit të Ballkanit Perëndimor dhe do të mirëpres përkushtimin e këtyre vendeve për këtë perspektivë si një zgjidhje e tyre strategjike. Kjo porosi do të jetë pjesë e Deklaratës së Zagrebit, një deklarate të përbashkët të cilën do ta miratojnë liderët e shteteve anëtare të BE-së dhe ata të rajonit në një video-konferencë të mërkurën më 6 maj.
Virusi që ka shkaktuar më shumë se 250 000 të vdekur në mbarë planetin dhe ka prekur shumë rëndë Europën, ndodhet në axhendën e një samiti, i cili fillimisht do të përqendrohet në aspiratat e gjashtë vendeve ballkanike për anëtarësimin në BE.
Me më pak se 500 të vdekur, 18 milionë banorët e Ballkanit Perëndimor e kanë shmangur për momentin një skenar eksploziv italian.
Por, drejtuesit europianë kërkojnë të sigurojnë mbështetjen e tyre për këtë rajon të Europës, ku emigrojnë në masë profesionistët mjekësorë, në një moment kur pandemia ka goditur ekonominë e bllokut dhe ka forcuar kufijtë.
Brukseli njoftoi një ndihmë prej më shumë se 3,3 milliardë euro për të ndihmuar Ballkanin Perëndimor për të luftuar kundër COVID-19 dhe për të rimëkëmbur ekonomitë.
Që prej fillimit të pandemisë, europianët janë angazhuar për të konfirmuar ndihmën e vazhdueshme të injektuar që prej 20 vitesh në Ballkanin Perëndimor dhe ndihmat specifike të destinuara për luftën kundër koronavirusit.
“Kjo ndihmë konfirmon solidaritetin e fortë të Brukselit. Ne kemi përgjegjësi të veçantë për të ndihmuar partnerët tanë të Ballkanit Perëndimor sepse e ardhmja e tyre është qartësisht në BE”, theksoi në një komunikatë presidentja e Komisionit Europian Ursula von der Leyen.
“Samiti do të tregojë angazhimin e BE-së për perspektivat europiane të Ballkanit Perëndimor. Kandidatët do të kujtohen gjithashtu për reformat që do të duhet të zbatojnë”, deklaroi një burim diplomatik në Bruksel.
Samiti BE-Ballkan Perëndimor do të bashkojë krerët e shteteve ose qeveritë nga vendet anëtare të BE-së, udhëheqës nga gjashtë partnerët e Ballkanit Perëndimor: Shqipëria, Bosnja dhe Hercegovina, Serbia, Mali i Zi, Republika e Maqedonisë së Veriut dhe Kosova.
Presidenti i Këshillit Europian, Charles Michel, do të kryesojë takimin. Ai do të përfaqësojë BE-së së bashku me presidenten e Komisionit Europian, Ursula von der Leyen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
