Shqipëria po përballet me një situatë kritike për shkak të zjarreve që vazhdojnë të mbeten aktive prej më shumë se dy muajsh, ku pothuajse çdo ditë raportohen vatra të reja dhe të rrezikshme.
Gjatë ditës së sotme, situata më problematike dhe alarmante paraqitet në qarqet e Lezhës dhe Shkodrës, ku flakët po kërcënojnë sipërfaqe të tëra pyjore, por edhe zonat e banuara, duke angazhuar në terren të gjitha strukturat e emergjencave civile.
Në qarkun e Shkodrës, situata mbetet tejet e tensionuar, veçanërisht në zonën e Bardhajve. Prefektja e Shkodrës, Holta Duda, në një prononcim të gjatë për ‘MCN Informacion’ ka sqaruar dinamikën e operacioneve dhe vështirësitë me të cilat po përballen ekipet e shpëtimit në terren.
Aktualisht ndodhem në Bardhaj të Shkodrës, ku situata paraqitet shumë problematike pasi para pak orësh janë rrezikuar seriozisht edhe banesat e qytetarëve, ndërsa unë po lëviz pa ndërprerje drejt vatrave më kritike për të monitoruar operacionet. Kjo situatë e vështirë vijon prej tre ditësh dhe forcat zjarrfikëse janë plotësisht prezente në terren, duke u mbështetur në mënyrë të vazhdueshme nga një ndërhyrje e kombinuar dhe e koordinuar mirë si nga toka, ashtu edhe nga ajri. Në të gjithë qarkun tonë kemi aktualisht katër vatra aktive, ku në tre prej tyre po operohet intensivisht me mjete zjarrfikëse, ndërsa në Bardhaj po ndërhyhet edhe nga ajri për shkak të terrenit dhe rrezikut të banesave. Përveç kësaj, kemi dy vatra të tjera në Iballë dhe në Malin e Tërbunit, e cila po ashtu paraqitet mjaft problematike, por është punuar gjatë gjithë ditës për izolimin e plotë të zjarrit. Një tjetër vatër është aktive në Vau i Dejës që nga dita e djeshme, ku aktualisht po mundohemi ta mbajmë nën kontroll të rreptë. Të gjitha forcat tona janë në terren dhe puna që po bëhet për shuarjen e flakëve mund të dokumentohet edhe përmes monitorimit ajror; trupat zjarrfikëse kanë qenë aktive gjatë gjithë kohës dhe ndërhyrja e përforcuar e helikopterëve ka bërë të mundur shpëtimin e shtëpive të banorëve, duke garantuar se e gjithë mbështetja e nevojshme logjistike dhe njerëzore është dhënë në kohë.
Në anën tjetër, qarku i Lezhës po përballet me një betejë po aq të ashpër me flakët, ku janë regjistruar dy vatra të mëdha, specifikisht një në Bashkinë e Lezhës dhe një në Kurbin. Prefekti i Lezhës Landi Manshi në këtë qark ka bërë një pasqyrim të detajuar të operacioneve të shpëtimit dhe rreziqeve aktuale.
Në qarkun tonë kemi dy vatra aktive, një në Lezhë dhe një në Kurbin, por vatra më problematike dhe që kërkon vëmendje maksimale është ajo në bashkinë e Lezhës, saktësisht në fshatrat Kanivac, Zimaj dhe Rras. Në këtë vatër po ndërhyhet me të gjitha kapacitetet, ku janë angazhuar forcat ushtarake, mjetet zjarrfikëse, trupat e Forcave të Armatosura si dhe një numër i madh vullnetarësh e banorë të zonës, të cilët janë mjaft të shqetësuar për pronat e tyre. Për shkak të rrezikshmërisë së lartë, në tre banesa ku shfaqej rrezik i drejtpërdrejtë, ne kemi dislokuar menjëherë mjetet zjarrfikëse për të parandaluar çdo avari apo përparim të flakëve në drejtim të shtëpive ose vetë banorëve. Ndërkohë, vatra tjetër e zjarrit që është regjistruar në bashkinë e Kurbinit mbetet e vështirë për t'u izoluar, pasi ndodhet në një terren tejet të thepisur dhe plotësisht të paaksesueshëm nga mjetet tokësore, gjë që vështirëson operacionin.
Për të plotësuar panoramën e kësaj situate të rëndë që po zgjat prej dy muajsh, ish-kreu i emergjencave civile Shemsi Pençi ka dhënë alarmin për pasojat afatgjata dhe nevojën për monitorim të rreptë të territorit.
Problemi i zjarreve në Shqipëri është një problem që ka të bëjë me sistemin pasi kryetarët e bashkive nuk raportojnë në kohë reale për faktin se s’kanë emëruar vrojtuesit e territorit ku ka rriskë të lartë për fatkeqësinë e zjarrit sepse zjarri po nuk u pikas në momentet e para ai merr përmasa dhe pastaj mund të futësh shumë mjete për fikjen e tyre por bëhet e pamundur. Kjo situatë e pazakontë që po zgjat prej më shumë se dy muajsh tregon se strukturat tona përballen me një sfidë të jashtëzakonshme mjedisore dhe operacionale, ku shfaqja e përditshme e vatrave të reja kërkon jo vetëm reagim të shpejtë, por edhe një strategji të mirëfilltë parandalimi. Terreni i thyer në zonat e Kurbinit apo Malit të Tërbunit dëshmon se pa një mbështetje të fuqishme nga ajri dhe pa pajisjen e forcave tona me mjete moderne të mbrojtjes nga zjarri, do ta kemi gjithmonë e më të vështirë të mbrojmë mushkëritë e gjelbra të vendit dhe jetën e banorëve që jetojnë pranë këtyre masive pyjore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
