Parandalohet sulmi në Zveçan, Kurti kritika shefit të diplomacisë evropiane

Policia e Kosovës ka njoftuar se ka parandaluar një sulm terrorist pasi kapi një makinë me armatim dhe eksploziv në Zveçan. “Kjo është edhe një dëshmi e radhës që Serbia përmes grupeve dhe organizimeve të tilla synon të destabilizojë vendin tonë”, ka shkruar Sveçla në Facebook. Më herët kryediplomati evropian Josep Borrell i ka rënë kambanave të alarmit për mundësinë e përshkallëzimit të situatës në veri të Kosovës. “Shumë i alarmuar nga situata në veri të Kosovës: arrestime jashtëgjyqësore të serbëve të Kosovës dhe Forcat e Sigurisë së Kosovës që marshojnë në Mitrovicën e Jugut; ndjekur nga retorika e fortë nga Serbia. Pavarësisht takimit për menaxhimin e krizës, përshkallëzimi vazhdon dhe po bëhet i rrezikshëm. Nuk do ta tolerojmë”. Por sipas kryeministrit Kurti, përhapja e panikut i ndez më shumë tensionet. Ai kërkoi që të konfirmohen burimet para se të publikojnë lajme. “Përhapja e panikut dhe pretendimeve të rreme vetëm ndez tensionet dhe ndihmon ata që kërkojnë t’i përshkallëzojnë ato. Një thirrje për të gjithë: ju lutemi konfirmoni burimet tuaja dhe prisni informacione zyrtare nga institucionet e Kosovës përpara se të vendosni të angazhoheni publikisht në transmetimin e lajmeve ose parashikimin e ngjarjeve”. Ai e cilësoi si rutinë stërvitjen e Forcave të Sigurisë së Kosovës në Mitrovicën e jugut. “Stërvitjet e Regjimenti III të Forcës së Sigurisë së Kosovës në Mitrovicën e Jugut janë aktivitet rutinë, i planifikuar çdo vit, për të cilin KFOR-i ishte plotësisht i informuar”. Edhe pse palët, Albin Kurti dhe Aleksandër Vuçiç u takuan në Bruksel për të ulur tensionet, bisedimet nuk sollën rezultat. Aleatët ndërkombëtarë mbeten të shqetësuar për situatën në komunat me shumicë serbe në Kosovë.