Olmert: Sa më shpejt të bjerë qeveria e Netanyahut, aq më mirë për Izraelin

<p><em>“Shpresoj që qeveria të bjerë sa më shpejt” </em>dhe <em>“kjo marrëveshje duhet të ishte bërë tetë muaj më parë”.</em> Ish-kryeministri izraelit, Ehud Olmert, e përshkruan si “të tmerrshme” qeverinë e Benjamin Netanyahut. <a href="https://www.lastampa.it/esteri/2025/01/19/news/olmert_governo_netanyahu_crollo-14948808/?ref=LSHA-BH-P2-S4-T1#google_vignette">Në një intervistë në RAI3</a>, Olmert është shprehur se <em>“është humbur kohë. Ne kemi humbur jetën e shumë pengjeve izraelite, shumë ushtarëve izraelitë, shumë palestinezëve në Gaza. Sa më shpejt të ndryshojë qeveria izraelite, aq më mirë do të jetë për ne dhe për të gjithë rajonin”.</em></p> <p>Olmert ka komentuar edhe largimin e ministrit te Sigurisë Kombëtare, Itamar Ben-Gvir, &nbsp;dhe anëtarëve të tjerë të partisë ultra-konservatore Otzma Yehidit.</p> <p><em>"Ben Gvir është kundër marrëveshjes dhe Izraeli është kundër tij".</em></p> <p><em>"Ka ardhur koha për të pasur një lidership që ka guxim, që ka vendosmëri dhe që ka një vizion që mund të shikojë përtej vështirësive të menjëhershme,"</em> insistoi Olmert.</p> <p><em>"Në vendin tonë, ne duam të jetojmë në paqe. Ne mendojmë se mund të jetojmë në paqe me palestinezët, me një shtet palestinez përkrah atij izraelit, dhe paqja është hapi paraprak drejt një rendi të ri, drejt një boshti miqsh, mbështetësish dhe partnerësh në Lindjen e Mesme që mund të përfshijë edhe sauditët, Emiratet, Bahreinin, Egjiptin, Jordaninë, Palestinën, Izraelin dhe shumë vende të tjera myslimane që nuk janë pjesë e Lindjes së Mesme”.</em></p> <p>Për Olmert, kryeministër i Izraelit nga viti 2006 deri në vitin 2009, marrëveshja "është fillimi i asaj që shpresojmë se do t'i kthejë shtetit të Izraelit të gjithë pengjet ende të mbajtura nga Hamasi dhe kjo gjithashtu do t'i japë fund luftës në Gaza".</p> <p><em>"Është koha për t'i dhënë fund luftës në Gaza,"</em> thotë ai. <em>"Është koha për t'i dhënë fund vuajtjeve, është koha për të sjellë të gjithë pengjet në shtëpi, është koha për të liruar të gjithë pengjet që duhet të lirohen."</em></p> <p>Për Olmert, <em>"është koha që ne izraelitët të fillojmë një proces të shërimit kombëtar duke u fokusuar në përvojën e tmerrshme që kemi përjetuar për më shumë se 15 muaj, duke u përpjekur të rindërtojmë solidaritetin, besimin midis fraksioneve të ndryshme të shoqërisë izraelite dhe në të njëjtën kohë të fillojë një proces paqeje mes nesh dhe palestinezëve.</em>"</p> <p><em>"Paqja nuk është e dobishme vetëm për palestinezët, para së gjithash është e dobishme për ne</em> - thotë ai - <em>është e dobishme për ne sepse ka ardhur koha për t'i dhënë fund konfliktit, gjakderdhjes, luftimeve që kanë karakterizuar këtë rajon për shumë vite dhe pas përvojës që kemi pasur vitin e fundit, si palestinezët ashtu edhe ne e kemi kuptuar se lufta nuk sjell asgjë pozitive. Në vend të kësaj, alternativa përfaqëson një të ardhme më të mirë për të gjithë ne</em>”.</p>